चलः व खुसिबालं देय्न्यंकं प्रभावित

येँ (नेपालभाषा टाइम्स)÷ देय्न्यंकं मदिक्क वया च्वंगु वाया कारणं वःगु खुसिबाः व चलखय् लानाः लछिया दुने ७० म्हेसिया ज्यान वनेधुंकूगु दु । नेपाल प्रहरीया कथं वंगु जेठ २८ गते निसें म्हिगः सोमवाः तकया दुने ७० म्हेसिया ज्यान वंगु, ८६ म्ह घाःपाः जूगु व न्याम्ह बेपात्ता जूगु दु । थ्व ई दुने देय्न्यंकं खुसिबाः वःगु व चलं वंगु ९६६ गू घटना जूगु खँ केन्द्रीय प्रहरी प्रवक्ता डिआइजी दानबहादुर कार्कीं राससयात कनादीगु दु । थ्व घटनाय् लानाः ८६ खा छेँय् क्षति जूगु व स्वसः ३५ म्ह पशु सीगु दु ।

थ्वहे झ्वलय् वंगु शनिवाः वःगु चलखय् लानाः स्वम्हेसिया तनहुँया काउरे गामय् ज्यान वंगु दु । थनया हिरा नेपालीया छेँ चलखं ल्हाःगु खःसा थुकी लानाः नेपाली लिसें वया जःलाखःला ३७ दँया अनिशा बाँस्तोला व ६५ दँया श्याम भण्डारी सीगु खः । चलखय् लानाः मेपिं प्यम्ह नं घाःपाः जूगु खः । चलः वइ थें खनेदुगुलिं नेपालीया छेँय् च्वंगु सामान ल्ह्ययेत वनाच्वंपिं बाँस्तोला व भण्डारीयात चलखं ल्हाःगु खः । चलः वंथाय् माला स्वःबलय् आइतवाः तिनि उमिगु सीम्ह लुइकूगु खः ।

कर्णालीइ यातायात अवरुद्ध
छवाः न्ह्यःनिसें मदिक्क वा वयाच्वंगु कर्णाली प्रदेशया न्यागू जिल्लाय् यातायात हे बन्द जूगु दु । मदिक्क वा वयाच्वंगुलिं सतक व हवाइ सेवा निगुलिं बन्द जूगु खः । थनया प्यंगू विमानस्थलं उडान जुइफयाच्वंगु मदुसा कर्णाली राजमार्ग व कर्णाली करिडोरया थीथी थासय् चलः वनाच्वंगुलिं सवारी साधन नं चले जुइ फयाच्वंगु मदु । वा वयाच्वंगु कारणं मुगुया रारा, हुम्लाया सिमिकोट, जुम्लाया जुम्ला व डोल्फाया जुफाल विमानस्थल छवाः न्ह्यःनिसें बन्द जुयाच्वंगु दु ।

यातायात बन्द जूगुलिं हथाय्गु ज्याय् वनेमाःपिं हे गनं वने फयाच्वंगु मदु । थुकिं यानाः गुलिसिया परीक्षा हे बीमखंगु दुसा गुलिखे मनूत उपचारया निंतिं तकं वने मफयाच्वंगु दु । सडक डिभिजन कार्यालय जुम्लाया इन्जिनियर बीरबहादुर जिटिकां कर्णाली राजमार्गया कालिकोट खण्डया थीथी थासय्, दैलेखय् यानाः झिंनिथाय् चलः वनाः लँ बन्द जूगु खँ धाःगु दु ।

दोधारा चाँदनीइ २४ घन्टाया दुने ५७३ मिलिमिटर वा
जल तथा मौसम विज्ञान विभागया कथं कञ्चनपुरया दोधारा चाँदनीइ थ्व दँया हे दकलय् अप्वः वर्षा मापन जूगु दु । महाकाली खुसि पारी दोधारा चाँदनी आइतवाः निसें सोमवाः २४ घन्टठाया दुने ५७३ मिलिमिटर वर्षा मापन जूगु खँ धाःगु दु ।

विभागया अत्तरियास्थित महाकाली बेसिन फिल्ड कार्यालया प्रमुख सञ्जय साहं दोधारा चाँदनीइ थुलिमछि वा वःगु नेपाःया इतिहासय् हे न्हापांखुसी जूगु खँ धाःगु दु । थ्वयां न्ह्यः दकलय् अप्वः वा वःगु रेकर्ड धयागु हेटोंडाय् ५१६ मिलिमिटर वा वःगुयात मापन यानातःगु दु । तसकं वा वःगु कारणं दोधारा चाँदनी व जःखःया क्षेत्र डुबानय् लाःगु दु । थुगु लागाय् अझ नं तसकं वा वयेफु धासें उच्च सतर्कता नालेत धाःगु दु ।

दुई सय मिमि स्वयां अप्वः वा वल धाःसा अति भारी वर्षा कथं मापन याइ । तसकं वा वःगुलिं यानाः महाकाली, कर्णाली, ठूलीगाड, मोहना, खुटिया, कान्द्रा, घुरुवा, कटैनी, स्याली, दोदा, चौदर लगायतया खुसिइ जलसतक थहां वःगु खँ धाःगु दु । खुसिबाः वयाः थनया थीथी थाय् डुबानय् लाःगु दु । जिल्ला प्रहरी कार्यालय कञ्चनपुरया कथं थनया फुक्क धयाथें भूभाग खुसिबालं प्रभावित जूगु दु ।
जिल्ला प्रहरी कार्यालय कञ्चनपुरया प्रवक्ता प्रहरी नायब उपरीक्षक उमेश जोशीं जिल्ला न्यंंकं खुसिबालं प्रभावित जूगुलिं १,६२२ म्हेसित उद्धार यानाः सुरक्षित थासय् यंकागु खँ धाःगु दु ।

खोटाङया ग्रामणि सडक अवरुद्ध
तसकं वा वःगुलिं खोटाङया ग्रामीण सतक नं अवरुद्ध जूगु दु । यक्व वा वयाः लः बाःवःगुलिं कच्ची अवस्थाय् दुगु फुक्क धयाथें ग्रामीण सतक बन्द जूगु खँ धाःगु दु । सतक अवरुद्ध जुइवं थुगु जिल्ला हे थीथी थाय् राष्ट्रिय सतक सञ्जाललिसेया स्वापू त्वाःदःवंगु दु ।

जयपृथ्वी राजमार्ग नं अवरुद्ध
तसकं वा वयाः चलः वनेवं बैतडीया जयपृथ्वी राजमार्ग हाकनं बन्द जूगु दु । चलखं यानाः आइतवाः चान्हय् निसें थ्व राजमार्ग बन्द जूगु खः । बैतडीया पाटन नगरपालिका ८ य् लाःगु साणीघाटीइ चलः वंगु खँ जिल्ला प्रहरी कार्यालय बैतडीं धाःगु दु । वंगु असार २२ व २३ गते नं चलः वनाः बन्द जूगु थ्व राजमार्ग आइतवाः जक चायेकूगु खः । तर चान्हय् हाकनं चलः वयाः लँ बन्द जूवंगु खः ।

कैलालीया जनजीवन प्रभावित
तसकं वा वयाच्वंगुलिं कैलालीया जनजीवन नं प्रभावित जूगु दु । थनया भजनीइ आइतवाः चान्हय् बस्तीइ लः दुहां वयेवं तःम्ह मनूत विस्थापित जूगु दु । बस्तीइ लः दुहां वयेवं मनूत छेँ त्वःताः हुलाकी सतकय् च्वं वनाच्वंगु दु । खुसिइ लः थहां वयाः भजनीया फुक्क धयाथें वडाय् लः दुहां वःगु दुसा ८ वडाय् छेँ हे डुबानय् लाःगु दु । कर्णाली खुसि बाः वयाः कैलालीया टिकापुर, भजनी, जानकी, व जोशीपुरया तटीय क्षेत्रया वस्ती डुबानय् लाःगु खः ।

कालीगण्डकी करिडोर नं बन्द

चलः वंगु कारणं बाग्लुङया कालीगण्डकी करिडोर नं स्वन्हु न्ह्यवनिसें बन्द जूगु दु । करिडोरया प्यंगू थासय् चलः वनाच्वंगुलिं सवारीसाधन चले मजूगु खँ धाःगु दु । शनिवाः सुथंनिसें करिडोरया थीथी थासय् चलः वंगु खः ।

राससया ग्वाहालिं