अनमोल केसी व न्हू न्हूपिं नायिका
खय् भाय्या संकिपा ख्यलय् छगू इलय् ‘प्लेब्वाय्’कथं चर्चितम्ह नायक खः भुवन केसी । व हे भुवन केसीया काय अनमोल केसी नं नेपाःया संकिपा ख्यलय् छम्ह चर्चितम्ह नायकया रुपय् दं वयाच्वंगु दु । अनमोल केसी नेपाःया संकिपा ख्यःया निंतिं न्हूगु नां मखये धुंकल । लिपांगु इलय् वं म्हितूगु संकिपानानापं वयागु नं चर्चा जुयाच्वंगु दुसा लिपा थ्यंकं जुयाच्वनी धइगु आशा यायेछिं । अनमोल केसी न्हू पुस्ताया दथुइ लोकंह्वाःम्ह नायक खः ।
गथे भुवन केसीयात छगू इलय् प्लेब्वाय नायककथं म्हसीकीगु खः अथे हे लिपांगु इलय् अनमोल केसीयात ‘चकलेटी’ हिरो धकाः धायेगु यानाहःगु दु । उलिजक मखु अनमोलयात भविष्यया छम्ह ‘सुपरस्टार’ धकाः नं धायेगु याना हयाच्वंगु दु । अथेला लिपांगु इलय् वयाः खय् भाय्या संकिपा ख्यलय् आपालं मेमेपिं स्टारतय् मस्त नं थ्व ख्यलय् दुहां वयाच्वंगु दु । नेपाःया संकिपा ख्यलय् खने दयेकः वःपिं स्टारतय् मस्त मध्ये दकलय् अप्वः लोकंह्वाःम्ह धाःसा अनमोल केसी हे खः ।
अनमोल केसी नायकया रुपय् गुलि लोहंह्वाः । उलि हे वया समकालीनत नायकया रुपय् संकिपा ख्यलय् दुहां वःसां सहनायकय् जक सीमित जुयाच्वंगु दु । अले गुलिं धाःसा थ्व ख्यलं तापाना नं वनेधुंकूगु दु । चर्चाया ल्याखं स्वयेगु खःसां नं अनमोल स्वयां मेपिं गाक्कं लिउने हे लानाच्वंगु दु । खय्तला अनमोलया अबु भुवन केसीं संकिपा निर्माण यानाः छगूकथं थः काययात ग्वाहालि यानाच्वंगु धाःसां छुं पाइमखु । अनमोलया दकलय् लिपा प्रदर्शनय् वःगु ‘कृ’ नांया संकिपाया नं निर्मातामध्ये छम्ह खः भुवन केसी । अथे हे थः काय अनमोलयात नायक दयेकाः भुवनं मेगु संकिपा ‘क्याप्टेन’ निर्माण याःगु दु ।
थः अबु भुवन केसीं हे निर्माण याःगु ‘साथी म तिम्रो’ नांया संकिपाय् बःचाहाकःगु भूमिकापाखें अनमोल नेपाली संकिपा ख्यलय् दुहां वःगु खः । अनमोलं दकलय् न्हापां नायक जुयाः म्हितूगु संकिपा हेमराज बिसी निर्देशित ‘होस्टेल’ खः । उकिं अनमोलयात हेमराजया ‘फेभरेट’ नायक धकाः नं धायेगु याः । हेमराजं हे निर्देशन याःगु संकिपा ‘जेरि’ व ‘गाजलु’या नायक नं अनमोल हे खः । अले थ्व स्वंगुलिं संकिपा व्यापारया ल्याखं उलि हे सफल नं जूगु दु । अनमोलं नं हेमराज बिसीया होम प्रोडक्सन संकिपाय् जक अभिनय याःगु खनेदु ।
थ्व हे झ्वलय् अनमोलं मेगु न्हूगु संकिपा म्हितेत्यंगु चर्चाय् वयाच्वंगु दु । छगू इलय् खय् भाय्या हे चर्चित नायिका नापं निर्माता–निर्देशक झरना थापां दयेकेत्यंगु ‘ए मेरो हजुर–३’ य् अनमोलं म्हितीगु जूगु दु । थ्व संकिपाय् अनमोलं झरनाया हे म्ह्याय् सहाना थापालिसें ‘स्क्रिन सेयर’ याइगु ज ूगु दु । थनथाय्लाक लुमंकेमाःगु वा न्ह्यइपुगु खँ छु दु धाःसा अनमोलं म्हितूगु संकिपाय् आतक सुं नं नायिका दोहोरे जूगु मदुनि । वं गुलि नं फिल्मय् म्हितल, दक्वलिइ नं न्हूपिं हे नायिकानाप जक म्हितूगु दु ।
अनमोलयात छगू इलय् बलिउड संकिपा उद्योगया नांजाःम्ह अभिनेता शम्मी कपुर नाप तुलना याइपिं नं दु । अनमोलयात शम्मी कपुरनाप तुलना याये नं ल्वः । शम्मी कपुरयात उगु इलय् छम्ह अतिकं ‘रोमान्टिक व डान्सिङ’ हिरो कथं कायेगु याइ । आः नेपाःया खय् भाय्या संकिपा ख्यलय् नं अनमोलं न्हू न्हूपिं नायिकानाप जक स्क्रिन शेयर याःगु ल्याखं उकथं तुलना याना स्वयेगु यानाहःगु खः । थ्व ल्याखं अनमोलयात ‘खय् भाय्या शम्मी कपुर’ धाःसां छुं पाइमखु । अनमोलं संकिपा ‘होस्टेल’य् रिस्ता बस्नेत, ‘जेरि’इ याना शर्मा व ‘गाजलु’इ पुलांम्ह मिस नेपाल सृष्टि श्रेष्ठ, ‘ड्रिम्स’य् साम्राज्ञीलक्ष्मी शाह, ‘कृ’ लय् अदिति बुढाथोकी थेंज्याःपिं न्हूपिं नायिका नापं म्हितूगु खःसा आः संकिपा ‘क्याप्टेन’य् प्रियंका नांया न्हूम्ह नायिकानाप खने दयेकः वयेत्यंगु दु ।
LEAVE YOUR COMMENTS