क्यानाडाया मिसिसागाय् नं न्हूदँ हनालिसें निसःम्हेसित मंकाः म्हपुजा

येँ – क्यानेडियन नेवाः गुथिं नं दँय्दसं थें थुगुसी नं नेपाल संवत् ११४० न्हूदँ थीथी ज्याझ्वः यासें हंगु दु । क्यानाडाया मिसिसागाय् गुथिं थीथी ज्याझ्वः यानाः न्हूदँ हनेगुया नापनापं निसःम्हेसित मंकाः म्हपुजा नं याःगु खः । न्हूदँ कुन्हु ‘नेपाल संवत् ११४० न्हूदँया भिंतुना’ च्वयातःगु प्लेकार्ड ज्वनाः धिमे बाजंसहितं स्थानीय लागाया परिक्रमा याःगु खः ।

अनं लिपा विधिपूर्वक मंकाः म्हपुजा ज्याझ्वः न्ह्याकूगु खः । उगु मंकाः म्हपुजाय् लुम्बिनी विश्वविद्यालयया पुलांम्ह उपकुलपति प्रा. डा. नरेशमान वज्राचार्यं म्हपुजा नेवाः समुदायया मौलिकलिसें झीगु जीवन दर्शनलिसे सतीगु सम्बन्ध दुगु पर्व जूगु खँ कनादिल ।

वय्कलं म्हपुजा यायेत च्वइगु मन्दःया बारे जानकारीइ बियादिसें मन्दलय् छ्यलीगु लः मन्दलं आत्मीय शुद्धता, चिकं मन्दलं परिपूर्णता व चक्रं मानव संवेदनालिसें पर्मात्मालिसेया मिलन खः धयादिल । लिसें झीसं म्हपुजा याइगु मन्दलय् पलेस्वांया च्याहलं अष्टसिद्धि, अस्टमातृकयात प्रतिविम्बित याइगु नं जानकारी बियादिल ।

थुकथं हे म्हपुजाय् छ्यलीगु जजंकां जीवनया पूर्णता, खेलुइता मतं जीवनय् जलं थीका बीगु, थीथी सिसाबुसां जीवनया आरोह अवरोहलिसें रसमय अवस्थायात प्रतिविम्बित याइगु, म्हपुजाय् बीगु सगं ज्वलं न्या, ख्यें, वः, ला व अय्लाखं जल, वायु, आकाश, पृथ्वी व अग्निया रुपय् पंचतत्वया प्रतिनिधित्व याइगु नं जानकारी बियादिसें जीवन, संस्कृतिया बारे प्रवचन नं बियादीगु खः ।

ज्याझ्वलय् गुथिया नायः प्रकाश प्रधान, मूछ्याञ्जे बिमल श्रेष्ठ, ज्याझ्वःया कजि सुमन राजबंशीं नेवाः भाय्, कला, संस्कृतिया प्रवद्र्धन यायेगु नापं न्हूगु पुस्तायात लःल्हाना वनेमाःगु खँय् बः बियादिल । तःजिक म्हपुजाया ज्याझ्वः लिपा सांस्कृतिक ज्याझ्वः नं न्ह्यब्वःगु खः ।

उगु सांस्कृतिक ज्याझ्वलय् सानुराजा महर्जन, रञ्जना सैंजू, उत्तम माकजु, विमल श्रेष्ठ, रिकेश श्रेष्ठ, रविन प्रधान, डा. कृष्ण भण्डारी, डा. अमर सैंजू, डा. उद्धव श्रेष्ठ, तारक जोशी लगायतया पुचलं नेवाः व खय् भाय्या म्येँलिसें सांगीतिक धुन न्ह्यब्वःगु खः । अथे हे टोरन्टो विश्वविद्यालयय् नेवाः बौद्ध धर्मय् पीएचडी यानादीम्ह विद्यार्थी ईयन टर्नरं ‘व छु गल्ली, थ्व छु गल्ली’ म्येँ हालाः न्यंकादीगु खःसा वय्कःयात नरेश ताम्राकार व उत्तम माकजुं मगःखिं व ताः थानाः ग्वाहालि यानादीगु खः ।

गुथिया आजीवन दुजःपिंत मूपाहां वज्राचार्यं दसिपौ लःल्हानादीगु ज्याझ्वलय् ब्रोक विश्वविद्यालयया प्राध्यापक डा. टम ओ’नील, टोरन्टो विश्वविद्यालयया पीएचडी तहया विद्यार्थीपिं आम्बर मूर, ईयन टर्नर व स्नातकोत्तर तहया अस्टिन गोमेस, अलाना लगायत आपालं गैर नेवाःतय्सं नं मंकाः म्हपुजाय् ब्वति काःगु खः ।

सम्बन्धित बुखँ

LEAVE YOUR COMMENTS