शिक्षा मन्त्रालयं पाखें शुल्क मकायेत सचेत

येँ (नेपालभाषा टाइम्स) – शिक्षा मन्त्रालयं निजी स्कुलतय्त संचालन मजूगु अवधितक शुल्क मकायेत निर्देशन बिउगु दु । सामेवाः मन्त्रालयया प्रवक्ता दिपक शर्मां छगू विज्ञप्ति जारी यासें शुल्क मकायेगु निंतिं प्याब्सन, एनप्याब्सनयात सचेत याःगु खः ।

निजी विद्यालयतय् मू संगठन प्याब्सन, एनप्याब्सनं आइतवाः छगू विज्ञप्ति पिकासें अभिभावकपिंत शैक्षिक सत्र २०७७या शुल्क पुलेत इनाप याःगु खः । थ्वयां न्ह्यव हे थीथी निजी स्कूलतय्सं अभिभावकपिंत शुल्क पुलेत सर्कुलर छ्वया हयेधुंकूगु खः । तर अभिभावकत धाःसा आखः हे मब्वंकूगु इलय् या तकं शुल्क कायेत स्वःगुलिं तम्वयाच्वंगु खः ।

प्रवक्ता शर्मां जारी याःगु विज्ञप्तिइ प्याब्सन, एनप्याब्सनं याःगु अपिलं मन्त्रालयया ध्यानाकर्षण याःगु धासें विद्यालययात छुं समस्या दुसा सहलह यानाः समाधान यायेफइगु खँ धाःगु दु ।

निजी स्कूलतय्सं धाःसां लकडाउनया अवधिइ सरकारं छुं राहत मबिउगु धासें शुल्क म्हये माःगु खँ धयाच्वंगु दु । स्कुलतय् शुल्क सम्बन्धी अनुगमन यायेगु जिम्मेवारी थौंकन्हय् स्थानीय तहयात वयाच्वंगु दु । मन्त्रालयं नं स्कूलतय्त स्थानीय तहलिसे सहलह यायेत नं इनाप याःगु दु ।

मेखे अनेरास्ववियु व नेविसंघ थेंज्याःगु विद्यार्थी संगठनं नं अभिभावकपिंत स्कुलया शुल्क मपुलेत इनाप याःगु दु । निगुलिं संगठनं सोमवाः बिस्कं बिस्कं हे विज्ञप्ति पिकासें स्कूल संचालन मजूगु अवधिइ शुल्क मपुलेत आह्वान याःगु खः ।