गज्याःगु छेँयात निर्माणसम्पन्न ?

येँ – यँ महानगरपालिकां नक्सा पास मयासे दयेकूगु छेँया अध्ययन यानाः निर्माण सम्पन्न प्रमाणपत्र बीगु धाःसां नं नक्सा अःखः दयेकूगु छेँयात धाःसा तत्काल निर्माण सम्पन्न प्रमाणपत्र मबीगु खँ सीदुगु दु ।
येँमनपां पिकाःगु थ्व सम्बन्धी सुचनय् निगू तल्लाया नक्सा पास यानाः प्यंगू तल्ला तक दयेकातःपिंत जक निर्माण सम्पन्न प्रमाणपत्र बीगु खँ धयातःगु दु ।

येँमनपा सूत्रया कथं येँ मनपां स्वंगू चरणय् निर्माण सम्पन्न प्रमाणपत्र बीगु ग्वसाः यानाच्वंगु दु । उकी मध्ये न्हापांगु चरणय् जग्गाया ‘फार’ गाःगु छँेया अध्ययन यानाः निर्माण सम्पन्न बी । फार मगाःगु छेँयात तत्काल निर्माण सम्पन्न मबीगु खँ धाःगु दु ।

येँमनपां सुचं पिकायेधुंकाः आपालं स्थानीय जनतां निर्माण सम्पन्न कायेगु बारे मनपाय् फोन यानाच्वंगु दु । आपाःसिनं खँ मथुयाः फोन यानाच्वंगु खँ थःगु नां कने चाहे मजूम्ह छम्ह कर्मचारीं ‘नेपालभाषा टाइम्स’ यात कनादिल । वय्कःया कथं तत्काल फार मगाःगु छेँयात निर्माण सम्पन्न बीगु छुं निर्णय जूगु मदु । न्हूगु वस्तिइ २ आना २ पैसा जग्गाया निंतिं साढे दुइ तल्लाया जक नक्सा पास जुइगु व्यवस्था दु । तर साढे दुइ आना जग्गाय् ३ तल्ला दयेकेगु ज्या जुल धाःसा अज्याःगु छेँयात नं निर्माण सम्पन्न मबीगु खँ वय्कलं कनादिल ।

येँ मनपां मेगु सुचं जारी यासें आःयात नक्सा पास मयाःसां नियम कथं दयेकातःगु छेँयात जक निर्माण सम्पन्न प्रमाणपत्र बीगु धाःगु दु । अथेहे सुचनय् स्वीन्यान्हुया दुने भवन विभागय् वयाः निवेदन तः वयेत नं इनाप यानातःगु दु ।

तर येँया पुलांगु वस्तीइ धाःसा उगु नियम लागू मजुइगु खँ सीदुगु दु । येँया पुलांगु वस्तीइ न्ह्याक्व हे म्हो जग्गा दुसां नं साढे चार तल्ला छेँ दने फइ । जग्गा अप्वः दुगु खण्डय् जग्गाया फार कथं तल्ला थप यायेफइ । अय्नं म्हो जक जग्गा दुसां न्हय्गू च्यागू तल्ला दनातःगु छेँयात धाःसा तत्काल निर्माण सम्पन्न मबीगु खँ धाःगु दु ।

मनपा विशेष सूत्रया कथं तत्कालया निंतिं फार गाःपिंत निर्माण सम्पन्न बीगु जुइ, वयां लिपा फार स्वयां १० प्रतिशत अप्वः निर्माण जूगु छेँयात नं निर्माण सम्पन्न बीगु प्रक्रिया न्ह्याकी । वयां लिपा फार मगाःगु तर मापदण्ड स्वयां अप्वः तल्ला दयेकातःगु छेँयात अध्ययन यानाः निर्माण सम्पन्न बीफइगु खँ धाःगु दु । तर थ्व स्वंगूगु चरणय् तक वनेत गुलि ई काइगु खः व खँ धाःसा तत्काल धाये मछिं धाःगु दु ।

येँया पुलांगु बस्तिइ आपालं धइथें छेँ नक्सा पास मयासे दयेकातःगु व तःभुखाय् लिपा सरकारं नक्सा पास मयासे दयेकाः तःगु छेँ न्यायेमीगु लिसें बैंकय् ब¥हः तये मदइगु निर्णय याःगु खः । गुकिया लिच्वः कथं आपालं जनता प्रभावित जुयाच्वंगु दु । मस्तय् उच्च शिक्षाया निंतिं विदेशय् छ्वयेमाःपिं थुगु व्यवस्थां समस्याय् लानाच्वंगु दु । विशेष यानाः येँया नेवाःत थज्याःगु व्यवस्थां पीडित जुयाच्वंगु दु ।

येँमनपाय् स्थानीय चुनाव लिपा वःपिं जनप्रतिनिधिं थुकिया बारे निर्णय याइगु अपेक्षा स्थानीय जनतां यानाच्वंगु खःसां नं निर्माण सम्पन्न कायेत गुलि ई काइगु खः धइगु खँ धाःसा धायेफइगु स्थिति मदुनि ।