नागढुंगांनिसें धौख्यः तक रेल

रेलमार्ग दयेकेगु लागिं लगानी बोर्डपाखें टेन्डर आह्वान

येँ – सरकारं येँया नागढुंगांनिसें काभ्रेपलाञ्चोकया धौख्यः तक मेट्रो रेल सञ्चालन यायेगु निंतिं माःगु प्रक्रिया न्ह्याकूगु दु ।
प्रधानमन्त्री अध्यक्ष जुयाच्वंगु लगानी बोर्डं उगु मेट्रो रेल दयेकेगु प्रक्रिया न्ह्याकूगु खः । बोर्डं थ्वहे वंगु जेठ ३ गते छगू सार्वजनिक सुचं पिकासें उगु मेट्रो रेल दयेकेगु लागिं बोलपत्र आह्वान समेत याःगु खः ।

लगानी बोर्डं उगु रेलमार्ग दयेकेगु निंतिं विस्तृत सम्भाव्यता अध्ययन व दयेकेगु निंतिं माःगु तयारी आज्जु कथं विश्वव्यापी बोलपत्र आह्वान याःगु खः । आः वइगु लछिया दुने विस्तृत सम्भाव्यता अध्ययनया निंतिं इच्छुक कम्पनीं प्रस्ताव बुझे यायेगु कथं बोलपत्र आह्वान याःगु खः ।

न्हापांगु चरणय् परामर्शदाता चयन यानाः रेलमार्गया अध्ययन याइगु खँ धाःगु दु । सार्वजनिक निजी साझेदारी (पीपीए) ढांचाय् शहरी यातायातयात व्यवस्थित यायेगु आज्जु कथं मेट्रो रेलया अध्ययनया निंतिं प्रारम्भिक ज्या न्ह्याकागु खँ बोर्डं धाःगु दु ।बोर्डं छनोट याइगु परामर्शदातां विस्तृत सम्भाव्यता अध्ययन प्रतिवेदन (डिएफएस) तयार यायेमाः ।

उगु ज्याया निंतिं नेपाल सरकारं हे स्रोतया व्यवस्थापन याइगु खँ धाःगु दु । वइगु प्यदँया दुने मेट्रो रेल चले यायेगु तयारी कथं माःगु प्रक्रिया न्ह्याकागु खँ बोर्डं धाःगु दु । येँया नागढुंगांनिसें धौख्यः तक मेट्रो रेलया लम्बाई ४५ किलोमिटर दइगु खँ धाःगु दु ।
मेट्रो रेल दयेकेगु निंतिं प्रति किलोमिटर ४ अर्ब तका खर्च तुइगु खँ धाःगु दु ।

येँया नागढुंगां निसें ध्यौख्यः तक रेल दयेकेगु निंतिं १८० अर्ब तका खर्च जुइगु प्रारम्भिक अनुमान याःगु दु । ज्या पूवनीगु इलय् तक २ खर्ब तक तुइगु खँ नं प्राधिकरणं धाःगु दु । विस्तृत सम्भाव्यता अध्ययन व विस्तृत परियोजना प्रतिवेदन तयार जुइधुंकाः लगानी बोर्डया हे नेतृत्वय् निर्माण, सञ्चालन व हस्तान्तरण (बुट) ढाँचाय् उगु रेलमार्ग दयेकेगु प्रक्रिया न्ह्याकेगु खँ धाःगु दु ।

येँय् मोनोरेलया तयारी

थ्वहे झ्वलय् राजधानी येँ दुने नं मोनो रेल सञ्चालन यायेगु तयारी जुयाच्वंगु खँ येँ मनपाया मेयर विद्यासुन्दर शाक्यं कनादीगु दु । येँय् थौंकन्हय् सतक विस्तारया नामय् सर्वसाधारण जनताया छेँ थुनेगु गुगु ज्या न्ह्यानाच्वंगु खः, उकियात नियन्त्रण यायेगु लागिं नं आः मोनो रेल थेंज्याःगु अवधारणा महसें मगाःगु खँ ‘नेपालभाषा टाइम्स’यात कनादिल ।

सम्बन्धित बुखँ

LEAVE YOUR COMMENTS