भिक्षु डा. सुगन्धयात अतिविशिष्ट धार्मिक महत्वया राजकीय सम्मान

येँ- थाइल्याण्डया राजसंस्थापाखें नेपाःया भिक्षु डा. सुगन्ध महास्थविरयात अतिविशिष्ट धार्मिक महत्वया राजकीय सम्मानयुक्त औपचारिक प्रमाण पत्र लःल्हाःगु दु ।

थाइल्याण्डया जुजु महाबजिराङ्कनपाखें थौंकन्हय् थाइल्याण्डय् च्वँच्वना बिज्याःम्ह नेपाःया भिक्षु डा. सुगन्ध महास्थविरयात अतिविशिष्ट धार्मिक महत्वया राजकीय सम्मानयुक्त स्वंगूगु तहया ‘फ्रा धम्माशाक्यवंशीवसुत’ पद्वीया औपचारिक प्रमाणपत्र लःल्हाःगु खः । थाइ राजसंस्थापाखें थुकथंया सम्मान प्राप्त याना बिज्याःम्ह वसपोल भिक्षु डा. सुगन्ध न्हापांम्ह नेपाःमि भिक्षु खः ।

वंगु कौलाथ्व दशमि (चालं) अर्थात अशोक विजयाकुन्हु राजधानी बैंककय् छगू समारोहया दथुइ शाही प्रतिनिधिं उगु पद्वीया आधिकारिक प्रमाणपत्र लःल्हाःगु खः। वसपोलयात थगुने असार महिनाय् हे थाइ राजसंस्था व थाई बौद्ध संघपाखें उगु पद्वी प्रदान यायेगु निर्णय याःगु खः।

भिक्षु डा. सुगन्ध महास्थविरयात लःल्हाःगु थ्व पद्वी स्वंगूगु वरियताया खःसा थ्व स्वयां थनिं दछि न्ह्यः प्यंगूगु वरियताया पद्वी ‘फ्रा देवशाक्यवंशपण्ति’ लःल्हाःगु खः । प्यंगू दशक न्ह्यवंनिसें थाइल्याण्डय् च्वनाः बौद्ध धर्म व बुद्ध शासनया ख्यलय् वसपोलं बियाबिज्याःगु योगदानया कदर यासें उगु पद्वी लःल्हाःगु खः । वसपोल थाइल्याण्डया नांजाःगु महामुकुट बौद्ध विश्वविद्यालयया डेपुटी रेक्टर नं खः ।