सिँल्यं सतःया समस्या ज्यंकेत माग

येँ – सिल्यँ सतः दयेकेगु ज्या क्वचायेधुंकाः अन पसः तयेगु निंतिं टेन्डर लाकूपिंसं आः तक नं थःपिसं पसःक्वः उपभोग यायेमखं धासें आक्रोश प्वंकूगु दु । ‘नेपालभाषा टाइम्स’ लिसें खँ ल्हायेगु झ्वलय् सिँल्यं सतःया छकू पसः टेन्डर लाकूम्ह स्थानीय विष्णुराज श्रेष्ठं थःपिंसं टेन्डर लाकेधुंकाः नं गुथिं संस्थानं पसः हस्तान्तरण मयाःगुलिं थःपिंत घाटा जुयाच्वंगु धासें याकनं समस्या समाधान यायेत माग यानादीगु दु ।

वय्कलं ताः ई तक थःपिंसं ध्यबा जम्मा यानाः तयेधुंकाः नं पसः तयेगु वातावरण मदुगु खँ कनादिसें समस्या याकनं ज्यंकेगु पाखे गुथि संस्थानं पहल मयाःगु द्वपं बियादीगु दु । अथेहे मेम्ह टेन्डर लाकूम्ह ओम श्रेष्ठं टेन्डर लाकाः पसः तयेगु थःगु ग्वसाः छखे लाःगु धासें ज्या यानाः नयेमाःपिं थः थेंज्याःपिंत गुथि संस्थानं निर्णय मयानाः समस्या जुयाच्वंगु खँ कनादीगु दु ।

सिँल्यं सतलय् थौंकन्हय् मरु सतः दयेकेगु निंतिं काष्ठमण्डप पुर्ननिर्माण समितिं ज्याकू तयातःगु दु । काष्ठमण्डप पुर्ननिर्माण समितिया संयोजक लिसें प्रदेश ३ या सांसद राजेश शाक्यं मरुसतः पुर्ननिर्माणया झ्वलय् पुलांगु बहुमूल्य सामान सुरक्षित रुपं तयेमाःगुलिं अन पसः तयेगु स्वयां समितिया ज्याकू तयाः सामानया सुरक्षा यायेमाःगु खँ धयादीगु खँ गुथि संस्थानया प्रवक्ता सरोज थपलियां कनादीगु दु ।

वय्कःया कथं टेन्डर लाकूपिंत पसः बीगु बारे गुथि संस्थानया बोर्डं नं निर्णय याये ल्यं दनि । संस्थानया पुलांपिं अध्यक्ष लिसें सदस्यपिं हिले धुंकूगुलिं यानाः बोर्डया बैठक च्वनेमफया च्वंगु खँ नं वय्कलं धयादीगु दु ।