पद्मरत्न लुमंतिइ स्मारिका पिकाइगु

येँ – नेपालभाषा आन्दोलनया न्ह्यलुवा लिसें वरिष्ठ मानव अधिकारवादी नेता पद्मरत्न तुलाधरया लुमंतिइ छगू बिचाः मुँज्या जुल । आदिवासी जनजाति राष्ट्रिय आन्दोलनया ग्वसालय् यलया कुपण्डोलय् च्वंगु सातोआकी स्मृति भवनय् उगु मुँज्या जूगु खः ।

मुँज्यां मदुम्ह तुलाधरया बारे स्मारिका पिकायेगु, लुमंति ज्याझ्वः यायेगु व कार्तिक ३० गते येँया बसन्तपुली जुइगु वृहत् बिचाः मुँज्याय् ब्वति कायेगु लिसें थीथी खलः पुचःयात ब्वति कायेत इनाप यायेगु निर्णय याःगु दु । अथेहे बिचाः मुँज्या व्यवस्थापन यायेत झिद्वः तका ग्वाहालि यायेगु निर्णय नं याःगु दु ।

बिचाः मुँज्या ज्याझ्वलय् आदिवासी जनजाति नेतापिं डा. ओम गुरुङ, आङकाजी शेर्पा व नेपाः राष्ट्रिय पार्टीया अध्यक्ष विजय सैजुपिंसं न्ववानादीगु खः ।