बिसिउँ वंपिं सहकारी गुलि थ्यन ?
येँ (नेपालभाषा टाइम्स)÷थौंकन्हय् सहकारी संस्थात समस्याय् लायेवं अज्याःपिं सहकारीत बिसिउँ वनेगु क्रम नं अप्वयाच्वंगु दु । बिसिउँ वंपिं संचालकत गुलि दु जुइ धइगु वास्तविक तथ्यांक वःगु मदुनि । तर वंगु निदँया दुने सहकारी ठगीया मुद्दा लाःपिं जक झिंनिसलं मल्याक संचालकत ‘फरार’ जुयाच्वंगु खँ सीदुगु दु ।
प्रहरी तथ्यांक कथं वंगु निदँया दुने बचत सहकारी संस्थाया बचतकर्तातय् ध्यबा नयाः बिसिउँ वंगु द्वपं लाःपिं झिंनिसः व न्हय्म्ह थ्यंगु दु । उजुरी मलाःसां बिसिउँ वंपिं स्वयेगु खःसा थ्व ल्याः अझ यक्व थ्यनी ।
सहकारी ठगीया मुद्दाय् वंगु निदँया दुने प्रहरीं मुक्कं ३४६ म्हेसित जक ज्वंगु दु । थुपिं ज्वंपिं मध्ये गुलिसित उपिं बिसिउँ वनाच्वंगु देशं हे ज्वना हयागु खँ नेपाल प्रहरीया प्रवक्ता प्रहरी नायव महानिरीक्षक दानबहादुर कार्कीं कनादीगु दु ।
सहकारी ठगीया मामिलाय् वंगु निदँया दुने १८४ गू मुद्दा अदालतय् दर्ता जुइधुंकूगु खँ नं वय्कलं कनादीगु दु । प्रहरीया तथ्यांक स्वयेगु खःसा बिसिउँ वनाच्वंपिनि तुलनाय् ज्वंपिनि ल्याः तसकं म्हो जक दु । प्रहरी तथ्यांक कथं आःतक उजुरी लाःपिं मध्ये २० प्रतिशतयात जक प्रहरीं ज्वनेत ताःलाःगु दु । प्रहरी प्रवक्ता कार्कीं नं ज्वंपिनि तुलनाय् बिसिउँ वनाच्वंपिं यक्व हे दुगु खँ धयादी ।
प्रहरीया कथं आःतक थीथी सहकारीया बचतकर्तातय्गु ७० अर्ब तका ध्यबा लितमबिउगु धकाः उजुरी लानाच्वंगु दु ।
सहकारीइ बचतकर्तातय् ध्यबा ठगे यानाः बिसिउँ वंपिं अप्वः थें विदेश वनीगु जूगुलिं ज्वनेत थाकुयाच्वंगु धापू प्रहरीया दु । अथे खःसां विदेशं नं ज्वनाहयेगु कुतः जुयाच्वंगु दु । प्रहरीं आःतक सहकारी ठगी मुद्दाय् खुम्हेसिया विरुद्ध रेडकर्नर नोटिस जारी यानातःगु दु । प्रहरीं जीबी राई, भुपेन्द्र राई, थानबहादुर बुढा लिसें भरत महर्जन, छेला नेपाली व देवकुमार नेपालीया नामय् रेडकर्नर नोटिस जारी यानातःगु दु । रेडकर्नर नोटिस जारी याःसां जीबी राईयात ज्वना हयेत थाकुयाच्वंगु प्रहरीया धापू दु । गृहमन्त्री रवि लामिछाने लिसे स्वापू दुम्ह राई थौंकन्हय् मलेसियाय् च्वनाच्वंगु दु धाइ ।
LEAVE YOUR COMMENTS