विश्व निकेतनया विद्यार्थी सीवं आन्दोलन

येँ (नेपालभाषा टाइम्स)-त्रिपुरेश्वरय् च्वंगु विश्व निकेतन माविया कक्षा ११ या मेनेजमेन्ट ब्वनीम्ह छम्ह विद्यार्थीं आत्महत्या याःगु धासें विद्यार्थीतय्सं प्रदर्शन याःगु दु । अन ब्वनीम्ह विद्यार्थी सदीक्षा चौधरी बुधवाः चान्हय् सिनाच्वंगु अवस्थाय् लूगु खः ।

विद्यार्थीतय्सं अनुशासन प्रमुखं बिउगु मानसिक यातनाया कारणं चौधरीं आत्महत्या याःगु धासें न्यायया माग यासें स्कुलय् प्रदर्शन याःगु खः ।

विद्यालयया प्रधानाध्यापक हेरम्बराज कँडेलं धाःसा मानसिक यातना बिउगु खँयात खण्डन यानादीगु दु । वय्कलं विद्यार्थी चौधरी नियमित रुपं विद्यालय मवःगु कारणं नियमित रुपं विद्यालय वा धकाः सल्लाह बिया छ्वयागु व वयां लिपा नं मवःगुलिं आः अभिभावक ज्वनाः वा धकाः बुधवाः सम्झे याना छ्वयागु खँ कनादीगु दु ।

विद्यार्थीतय्सं धाःसा विद्यालयया परामर्श विभागया प्रमुख नवराज लोहनीं ‘टर्चर’ बिउगु कारणं चौधरीं आत्महत्या याःगु धासें लोहनीयात निलम्बन यायेत माग याःगु दु । प्रधानाध्यापक कँडेलं विद्यार्थीया माग कथं शिक्षक, अभिभावक, विद्यालय व्यवस्थापन समिति व जनप्रतिनिधिया बैठकं अनुशासन लिसें परामर्श विभागया प्रमुख लोहनीयात निलम्बन यायेधुनागु खँ कनादीगु दु ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन