उपचुनाव लिपा उपचुनाव लिपा नेकपाय् विवादय् विवाद

येँ – नकतिनि क्वचाःगु उपचुनावया लिच्वः पिहां वयेवं सत्तारुढ दल नेकपा दुने आन्तरिक कचवं पिहां वःगु दु । खास यानाः प्रधानमन्त्री ओलीलिसे फरक मत तइपिं वरिष्ठ नेतातय्सं सरकारं बांलाक ज्या मयाःगु कारणं न्हापा थःपिंसं हे त्याका तःगु आपालं महत्वपूर्णं थासय् पार्टी बूगु खः धकाः द्वपं बियाहःगु दु ।

नेकपा बूगु दकलय् महत्वपूर्ण सिट ख्वप प्रदेश १ (क) खःसा मेगु महत्वपूर्ण सिट धरान उपमहानगरपालिकाया मेयर पद नं खः । न्हापा एमाले याकःचा जूबलय् त्याःम्ह अनया मेयर तारा सुब्बा आकाझाकां मदयेवं अन उपनिर्वाचन याये माःगु खः । थुकी नेकपाया प्रकाश राईयात बुकाः कांग्रेसया तिलक राईं चुनाव त्याकूगु खः ।

महत्वपूर्ण थासय् नेकपा बूसां प्रम ओली पक्षया नेतातय्सं धाःसा समग्रय् पार्टीयात थ्व उपचुनावय् खास क्षति मजूगु विश्लेषण न्ह्यःने तये हःगु दु । प्रधानमन्त्रीया प्रेस सल्लाहकार सूर्य थापां सामाजिक सञ्जाल मार्फत थःगु बिचाः तसें थ्व उपचुनावय् नेकपां न्हापा स्वयां स्वंगू सिट अप्वः त्याकूगु दावी यानादीगु दु ।

थ्व धइगु सिटया ल्याखं न्हापा स्ववयां ५.८५ प्रतिशत अप्वः खः । थुकिं यानाः पार्टीया आलोचना आवश्यक मजू धइगु तर्क वय्कलं तयादीगु दु । तर नेकपा दुनेया मेगु पक्षं धाःसा न्हापा एमाले याकःचा जूबलय् त्याका तःगु सिट आः माओवादीलिसे एकता जुइधुंकाः गय् यानाः बुत धकाः न्ह्यसः तयाहःगु दु ।