वैशाख स्वयां न्ह्यः भर्ना दिके मदु

येँ (नेपालभाषा टाइम्स)÷ वैशाख स्वयां न्ह्यः हे मस्त भर्ना बन्द याइगु स्कुलयात येँ मनपां कारबाही याइगु जूगु दु । येँ मनपा शिक्षा विभागं मनपा क्षेत्राधिकार दुने लाःगु स्कुलया नियमन यानाः वैशाख २ गतेनिसें १४ गते तक भर्ना काये हे माःगु व ई स्वयां न्हापा भर्ना बन्द यात धाःसा कारबाही यायेगु ख्याच्वः बिउगु खः ।

येँ मनपा शिक्षा विभागं थःपिंसं क्वःछिनातःगु ईया दुने विद्यार्थी भर्ना कायेमाः धासें व स्वयां न्ह्यः भर्ना बन्द यात धाःसा विभागं माने मयायेगु व अज्याःगु स्कुलयात नीन्याद्वः तका तक बं पुइकेगुनिसें कयाः विद्यालय हे दर्ता खारेज यायेगु तकया सजाय जुइ फइगु खँ धाःगु दु ।

स्वनिगलय् सञ्चालन जुयाच्वंगु स्कुलतय्सं चैत क्वमचायेवं हे सीमित सिटया निंतिं भर्ना कासें प्रवेश परीक्षा कायेगु यानाच्वंगु दु । निजी लिसें सामुदायिक विद्यालयं तकं सीमित सिट धकाः भर्ना चायेकाच्वंगु दु ।

तर विभागं धाःसा सामुदायिक विद्यालयं न्ह्याम्हं विद्यार्थीयात भर्ना कायेमाः धासें सतप्रतिशत युवा साक्षारता सम्बन्धी सरकारी योजना पूवंकेगु व फुक्कं मस्तय्त विद्यालय ब्वंकेगु अभियानयात ग्वाहालि यायेत इनाप नं याःगु दु । सरकारं थ्वहे वइगु वैशाख २ गतेनिसें राष्ट्रिय रुपं हे मस्त भर्ना अभियान न्ह्याकेत्यंगु दु । सरकारं थुगु दँया भर्ना अभियानय् ‘हाम्रो नगर, हाम्रो गाउँ सबै बालबालिकालाई विद्यालय पु¥याउँ’ धइगु नारा बिउगु दु ।

येँमनपा दुने ६४५ गू संस्थागत विद्यालय व ९१ गू सामुदायिक विद्यालय दु, गुकी निगू लाख स्वयां अप्वः विद्यार्थीतय्सं अध्ययन याना वयाच्वंगु दु । उगु फुक्कं विद्यालयय् भर्ना अभियान न्ह्यायेवं अनुगमन नं न्ह्याइगु खँ विभागं धाःगु दु ।