ने. सं. ११४३ चौलाथ्व तृतीया -

मापसे यानाः मोबाइल चले यानादीमते !

झीथाय् स्वनिगलय् थौंकन्हय् बहनि जुल कि ट्राफिक प्रहरीत थाय्थासय् च्वनाः मादक पदार्थ सेवन (मापसे) याःगु दु वा मदु धकाः चेकिंग यानाच्वनी । सतक दुर्घटनापाखें बचे जुइगु निंतिं थ्व बांलाः ज्या खत । थुकथं मापसे यानाः सवारी साधन चले मयायेत चेकिंग जक याइगु मखु, सार्वजनिक यातायात व थाय्थासय् बोर्डत तयातःगु नं झीसं खंकेफु ।

थ्व छुं न्हूगु खँ मखु ।तर अय्लाः त्वनातःगु अवस्थाय् अर्थात मापसे यानाः मोबाइल चले यायेमते धकाः होर्डिङ बोर्डय् तयातल धाःसा थ्व थेंज्याःगु चर्चाया विषय मेगु जुइ मखु । भारत व पाकिस्तानया विवादास्पद क्षेत्र खः जम्मु काश्मिर । थ्व हे जम्मु काश्मिरय् भारतीय प्रहरीं थुकथं हे अय्लाः त्वनाः मोबाइल चले मयायेत इनाप यासें बोर्ड तयातःगु दु ।

काश्मिरया मुगल रोडस्थित राजमार्गय् प्रहरीं उकथं तयातःगु साइन बोर्ड थ्व इलय् सामाजिक संजालय् भाइरल जुयाच्वंगु दु । प्रहरीं राजमार्गय् तयातःगु उगु बोर्डय् अंग्रेजीं ‘अय्लाः त्वनातःगु इल य् मोबाइल फोनया प्रयोग यानादीमते’ धकाः च्वयातःगु दु । थ्व बोर्ड हालसालय् जक तःगु धाःसा मखु, ताःई हे दयेधुंकल ।

उगु बोर्ड तयातःगु किपा सामाजिक संजालय् व्यापक भाइरल जुइवं स्थानीय प्रशासनं उगु बोर्ड चिइकेत आदेश बिउगु दु । लिसें भारत प्रशासित काश्मिरया ऐतिहासिक, चर्चित व व्यस्त राजमार्गमध्ये छगू मुगल रोडय् उकथंया बोर्ड तयातःगु सम्बन्धय् अनुसन्धान तकं न्ह्याकेधुंकूगु दु