डलर थहां वंगुलिं मूल्यवृद्धिया सम्भावना

येँ -नेपाःया ध्यबा डलर स्वयां कुहां वंगु कारणं आः बजाःभाः थहां वने फुगु खँ विज्ञतय्सं धाःगु दु । नेपाल राष्ट्र बैंकं बिहीवाः १ डलर बराबर १०९.८५ तका क्वःछिउगु खः । वंगु वैशाखं निसें अमेरिकी डलर निरन्तर मजबुत जुया वनाच्वंगु दु ।

भारतया अर्थतन्त्र कमजोर जूगुलिं यानाः डलर भाः थहां वंगु खः । भारत व नेपाःया विनिमय दर स्थिर जूगुलिं उकिया लिच्वः नेपाःया ध्यबाय् नं लाःगु खः । वंगु वैशाख तक प्रति डलर १०६.३८ तका जुयाच्वंगु खः ।

नेपालं विदेशं सामान झिके यायेत डलर हे पुलेमाःगु जूगुलिं आः डलर पुलाः झिके याइगु सामानया भाः थहां वनीगु खँ विज्ञतय्सं धाःगु दु । थुकिं नेपाःया व्यापार घाटायात अझ हे अप्वयेकीगु नं अनुमान याःगु दु ।

अथे हे थुकिं यानाः अमेरिका लगायत अष्ट्रेलिया आदि देशय् आखः ब्वनाच्वंपिं नेपाःया विद्यार्थीतय्सं अन पुले मालीगु शुल्क नं अप्वइगु जूगु दु । उमिगु शुल्क नेपालय् च्वंपिं अभिभावकतय्सं डलर न्यानाः पुलेगु यानाच्वंगु दु ।

डलरया भाः थहां वंगुलिं खाडी लगायत थीथी देशय् ज्या यानाच्वंपिं नेपाःमितय्त दइगु पारिश्रमिक धाःसा अप्वइगु जूगु दु । नेपाःया अर्थतन्त्रया अधिकांश रेमिटेन्सं धाने याइगु जूगुलिं आः रेमिटेन्सया रुपय् दुहां वइगु ध्यबाया परिमाण अप्वइगु खँ नं अर्थविद्तय्सं धाःगु दु । डलरया भाः थहां वन कि विदेशय् ज्या यानाच्वंपिं नेपाःमितय्सं पेश्की हे तलब कयाः तक नं नेपालय् ध्यबा छ्वा हइगु जूगुलिं आः छुं ई रेमिटेन्स अप्वयेफुगु अनुमान नेपाल राष्ट्र बैंकं याःगु दु ।

नेपालभाषा टाइम्स

च्वमिया मेमेगु

• नेवाः प्रतिष्ठान गठन यायेत माग
• केएनकेया ग्राजुएन ज्याझ्वः
• सक्व सांस्कृतिक संरक्षित क्षेत्र प्रस्तावित ऐन लःल्हात
• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल