ने. सं. ११४४ चौलाथ्व अष्टमी -

अन्नपूर्ण पत्रदयात्रीतय् ल्याखय् कीर्तिमान

पदयात्राया निंतिं विश्वन्यंकं लोकंह्वाःगु अन्नपूर्ण क्षेत्रय् २०१७ या दँय् वःपिं पदयात्रीतय् ल्याखं कीर्तिमान तःगु दु । ७६०० वर्गकिलोमिटर भूभागय् न्यनाच्वंगु अन्नपूर्ण संरक्षण क्षेत्र विश्वन्यंकंया पदयात्रीतय् आकर्षणया केन्द्र जुयाच्वंगु दु ।
सन् २०१७ य् अन्नपूर्ण क्षेत्रय् वपिं पदयात्रीतय् ल्याः जक थगुने स्वयां थ्यंमथ्यं ३९ प्रतिशतं अप्वःगु दु । अन्नपूर्ण संरक्षण क्षेत्र आयोजनां पदयात्रीत वःगु थ्व आःतकया हे दकलय् अप्वःगु खँ धाःगु दु ।

आयोजनाया कथं सन् २०१६ य् छगू लाख १४ हजार १८७ म्ह पर्यटक दुहां वःगु खःसा २०१७ य् छगू लाख ५८ हजार ५८८ म्ह पर्यटक अन्नपूर्ण चाःहिउवःगु खः । उच्च पहाडी व हिमाली क्षेत्रय् पदयात्रा यायेत नेपाः वइपिं मध्ये थ्यंमथ्यं ६० प्रतिशतं अन्नपूर्ण क्षेत्रयात हे ल्ययेगु याना वयाच्वंगु दु ।
थन वइपिं पर्यटकत दुर्घटनाय् लाःसां तुरुन्त जानकारी दइकथंया सुचना प्रणाली नं आयोजनां विकास यायेत्यंगु दु । आयोजनाया सुचना अधिकृत रश्मि आचार्यं धयादीगु दु, ‘छुं नं कथंया दुर्घटना जुल धाःसा पर्यटकतय् अवस्था सीकेत जिमिसं छगू संयन्त्र नं याकनं विकास यायेत्यनागु दु ।’ थुगु लागाय् इलय्ब्यलय् वइगु च्वापुफसं यानाः पर्यटक व गाइडत सीगु नं जुयाच्वंगु दु ।

आचार्यया कथं थौंकन्हय् अन्नपूर्ण आधार शिविर व घान्द्रुकया घोरेपानीया खुन्हु तकया मौसमया अनुमान यायेफइगु प्रविधि दु, आः थोरङ ला, मनाङ व मुस्ताङया नं जानकारी वइगु प्रणाली विकास यायेत्यंगु दु ।

अन्नपूर्ण क्षेत्रय् आधारशिविर, एबीसी थोराङला भञ्ज्याङ, मुक्तिनाथ, च्वय्या मुस्ताङ, मनाङ, घोरेपानी, मर्दी हिमाल, घान्द्रकया घोरेपानी लगायतया थाय् पदयात्राया निंतिं लोकंह्वाः ।