म्हिगः निसें भिसिटिएस लागू

येँ –  मालवस्तु तथा ढुवानी साधन अनुगमन प्रणाली (भिसिटिएस) म्हिगः निसें लागू जूगु दु । अर्थमन्त्री डा. युवराज खतिवडां म्हिगः छगू ज्याझ्वःया दथुइ भिसिटिएसया शुभारम्भ यानादीगु खः । भिसिटिएस वेबय् आधारित केन्द्रीय सूचना प्रणालीइ व्यावसायिक प्रयोजनया मालवस्तु व ढुवानी साधनया संक्षिप्त विवरण दुथ्याके जक मालसामान ओसार पसार यायेगु व्यवस्था खः ।

व्यावसायिक प्रयोजनया मालवस्तु आयात निर्यातकर्ता, उद्योग, भन्सार एजेन्ट, ढुवानी कम्पनी व वितरण तथा थोक विक्रेतां थोक स्तरय् विक्री यायेबलय् थ्व प्रणालीइ दुथ्याकाः जक ढुवानी यायेमाः ।राजश्व चुहावट –अनुसन्धान तथा नियन्त्रण) ऐन २०५२ या व्यवस्था कथं वंगु असार २३ गते राजपत्रय् प्रकाशित यानाः साउन १ गते निसें थ्व प्रणाली लागू याःगु खः ।

थ्व प्रणालीइ दुथ्याकेबलय् प्रयोगकर्ता थःम्हं हे युजर आइडी व पासवर्ड दयेकेफइ । विभागया वेबसाइटय् लगइन यानाः मालवस्तु व ढुवानी साधनया संक्षिप्त विवरण दुथ्याकेमाः । मालसामान गन्तव्यय् थ्यनेधुंकाः चालक व प्रयोगकर्तां सामान थ्यंगु जनाउ बीफइ । भिसिटिएसया शुभारम्भ यानादिसें अर्थमन्त्री डा. खतिवडां भिसिटिएसं व्यवसाययात औपचारिक, वैध व पारदर्शी याइगु खँ धयादिल ।

‘भिसिटिएस लागु जुइवं सरकारी निकायपाखें जुइगु अनावश्यक झन्झट वइगु दिनय् अन्त्य जुइगु अपेक्षा दु, तर थ्व प्रणाली बारे स्थानीयस्तर तक स्पष्ट जानकारी बीमाः’
भवाणी राणा,
अध्यक्ष, नेपाल उद्योग वाणिज्य महासंघ

वय्कलं धयादीगु दु, ‘भिसिटिएस विधिइ वइगु व्यावहारिक कठीना जिमिसं थू, अपारदर्शी अनौपचारिक व्यवसायपाखें झी पारदर्शी व्यवसायपाखे रुपान्तरित जुइगु झ्वलय् दु । थुकियात प्रविधि छ्यलाः व्यवसायीलिसे फेसलेस विधिपाखें इन्टरफेस यायेत स्वयाच्वनागु दु ।’ वय्कलं भिसिटिएस व्यवसाय तटस्थ जुइगु व स्वविवेकीय अधिकारयात स्वतः म्हो यानाः औपचारिक अर्थतन्त्र दयेकेगु पाखे थप ग्वाहालि याइगु विश्वास नं प्वंकादिल ।

नेपाल उद्योग वाणिज्य महासंघया अध्यक्ष भवानी राणां भिसिटिएस लागु जुइवं सरकारी निकायपाखें जुइगु अनावश्यक झन्झट वइगु दिनय् अन्त्य जुइगु अपेक्षा यानादिसें थ्व प्रणाली बारे स्थानीयस्तर तक स्पष्ट जानकारी बीत सचेतना ज्याझ्वः न्ह्याकेमाःगु खँय् बः बियादिल ।

नेपाल उद्योग परिसंघया अध्यष शतिस मोर व चेम्बर अफ कमर्सया उपाध्यक्ष कमलेशकुमार अग्रवालं भिसिटिएस लागू जुइवं राजमार्गय् तयातइगु ढाट चिलावनीगु लसताया खँ जूसां स्थानीयस्तरय् भरिया, ठेलागाडा, ट्याक्टरपाखें जुइगु ढुवानीइ समस्या वयेफुगु पाखे ध्यानाकर्षण यानादिल ।

सम्बन्धित बुखँ

LEAVE YOUR COMMENTS