सिक्किमय् नं यँयाःया क्षमा पुजा

येँ (नेपालभाषा टाइम्स) – थुगुसी येँयाः पर्व न्यायेके मखनाः भारतया सिक्किमय् नं थाय्थासय् कुमारि माजुयात क्षमा पुजा यायेगु ज्या जुल । येँय् यँयाः पर्व न्यायेकीगु इलय् हे सिक्किमय् नं कुमारिया रथ सालाः यँयाः न्यायेकेगु याना वयाच्वंगु खः । थुगुसी कोरोना महामारीया कारणं सिक्किमय् नं यँयाः न्यायेके मखंगु खः । यँयाः न्यायेके मखंगुलि सिक्किमया राजधानी गान्तोक लिसें देन्ताम व नाम्चीइ नं स्थानीय नेवाःतय्सं क्षमा पुजा याःगुखः । थ्व झ्वलय् गान्तोकय् स्थानीय गुर्जु सूर्यवीर तुलाधरं अनलाइन मार्फत क्षमा पुजा यानादीगु खः ।

अथे हे देन्तामय् स्थानीय देन्ताम जोनल गुथि व शाखाया ग्वसालय् क्षमा पुजा जूगु खः । उगु क्षमापुजाय् गुथिया नवनिर्वाचित दुजःपिंत शपथ ग्रहण याकेगु ज्या नं जूगु खः । येँय् नं थीथी द्यःपिनि क्षमा पुजा यासें थुगुसीया यँयाः हनेगु ज्या याःगु खः ।