न्हूदँ सनिल कि फिल्म फेस्टिभलया समापन ?

न्ह्यखँ
नेपालभाषाया फिल्म ख्यलय् छुं दँ न्ह्यः तःगू हे फिल्म फेस्टिभल जुल । थथे फिल्म फेस्टिभल जूगु धइगु बांलाःगु हे खँ खः । थुकिं नेवाः फिल्मख्यःयात थपुकेत ग्वाहालि हे याइसा फिल्मय् ज्या याइपिं कलाकार, प्राविधिकपिनिगु मनोबल थकाइ । तर थुकथं मनोबल थकाइगु ज्याया लिच्वः धइगु अज्याःगु फिल्म फेस्टिभलया विधिवत समापन ज्याझ्वः हे जुया मबिल धाःसा नुगः थहां वयेगु पलेसा क्वतुने यः ।

नेवाः फिल्म फेस्टिभलया ख्यलय् थथे हे जुयाच्वंगुखः । मच्छिन्द्र क्लबया ग्वसालय् दँय्दसं नेवाः संकिपा नखः जुया वयाच्वंगुलिइ ने.सं.११३४य् उगु संकिपा नखलय् स्वाकाः छगू शर्ट फिल्म कम्पिटिशन नं जुल । अले सिरपाः त्याकूपिनिगु नां नं घोषणा जुल । तर सिरपा धाःसा मबिउ । नेपालभाषा संकिपा समाजया ग्वसालय् निदँ न्ह्यः क्वचाःगु नेपालभाषा फिल्म फेस्टिभल ने.सं.११३६÷३७ तःजिक जुल ।

लच्छिइ छगू छगू यानाः दछिया झिंनिगू नेवाः फिल्म क्यनेगु कथं न्ह्याःगु उगु फिल्म फेस्टिभलं दथुइ छक्वः निला प्यला दिपाः नं काल । तर लिपा वनाः झिंनिगुलिं फिल्म क्यनाः उगु फिल्म फेस्टिभल क्वचायेकल । निदँ न्ह्यःहे फेस्टिभल क्वचाःसां थुकिया समापन जुइ मफयाच्वंगुलिइ थुगुसी वयाः तिनि उकिया विधिवत समापन ज्याझ्वः जुल ।

उलि जक मखसे मच्छिन्द्र क्लबया ग्वसालय् जूगु नेवाः शर्ट फिल्म कम्पिटिशनया बिइल्यंदनिगु सिरपा नं थगुने ने.सं.११३८य् जूगु संकिपा नखःया इलय् बियाः विधिवत समापन जूगु घोषणा यात । थुकथं तःदँ न्ह्यवंनिसें दिनाच्वंगु निगू संकिपा नखःया विधिवत समापन जूसांं नेपालभाषाया छगूयां छगू हे जक टेलिभिजन च्यानलया रुपय् धस्वाःगु नेपालमण्डल टेलिभिजनया ग्वसालय् नं छगू नेवाः फिल्म फेस्टिभल जुल ।

छगू हे ज्याझ्वलं स्वता स्वता आज्जु ज्वंबलय् स्वकुमिपिं भतिचा अलमल जूगु खनेदत । न्यू इयर नाइट हनाः न्ह्याइपुके धकाः वःपिं स्वकुमितय् निंतिं फिल्म फेस्टिभलया समापन ज्याझ्वः व दसिपौ इनाज्याझ्वलं चिनातये मफुबलय् अन दसिपौ इनाच्वंगु इलय् हलय् स्वकुमित खनेमंत ।

झिंच्यावाःतक छसिकथं वालय् छगू नेवाः फिल्म क्यनाः क्वचाःगु उगु फिल्म फेस्टिभलया छगू औपचारिक समापन ज्याझ्वःयानाः फेस्टिभलय् ब्वति काःगु झिंच्यागू नेवाः फिल्मयात म्हतिं न्याद्वः न्याद्वःतका किपु (टोकन मनि)देछायेगु धकाः घोषणा यानातःगु नेपालमण्डल टेलिभिजनया उगु फिल्म फेस्टिभलया समापन ज्याझ्वः आः तक मजूनि ।

समापन ज्याझ्वः
थन आः धाःसा वंगु वालय् जूगु नेपालभाषा फिल्म फेस्टिभल ने.सं.११३६÷३७ या समापन ज्याझ्वःयात छक्वः दुवालेगु कुतः यायेगु जुइ । नेपालभाषा संकिपा समाजया ग्वसालय् जूगु उगु फिल्म फेस्टिभलया समापन ज्याझ्वः दिनाच्वंगुयात कयाः थाय्थासं आपालं सः थ्वयाच्वंगु खःसा आः वयाः उगु समापन ज्याझ्वः जूगुलिं अज्याःगु सलं दिपाः काःगु दु ।

वंगु वालय् जूगु समापन ज्याझ्वःयात तँसाः कथं न्यू इयर नाइट धकाः नं नां छुनातःगु दुसाः अझ नेपाःस्टार हेल्थ फण्डया निंतिं च्यारिटी शो धकाः नं धयातःगु दु । थथे स्वंगू स्वंगू आज्जु ज्वनाः जूगु छगू हे ज्याझ्वःयात कयाः चर्चा याये ।

ज्याझ्वःयात छगू सांगीतिक ज्याझ्वःया रुपय् न्ह्याकूगु खःसा आपालं कलाह्यमिपिनिगु सहभागिता दुगु उगु सांगीतिक ज्याझ्वलय् राजमति संकिपाया नकिं हिसिला महर्जनया नापनापं भोगेन्द्र मानन्धर, रजनी खड्गी व रोजिना सुवालथेंज्याःपिं नेवाः सुपरस्टारया सिरपाःया निंतिं धेंधेंबल्लाखय् लाना च्वंपिं नांजाःपिं कलाकारयालिसें रञ्जना सित्तिखु व दिया श्रेष्ठ थेंज्याःपिं न्हूपिं कलाकारंं हुलाप्याखं क्यनादिल ।

ज्याझ्वलय् नेपालभाषा संकिपा ख्यलय् ताः ई न्ह्यवंनिसें पलाः न्ह्याका वयाच्वनादीपिं निम्ह कलाकारत नगीना जोशी व महन्तलाल मल्लयात हनाः महोत्सव ने.सं.११३६÷३७ या समापन ज्याझ्वः शनिबार यलया अशोक पार्टी पालेसय् तःजिक सम्पन्न जुल ।

नेपाःया ख्यालिजुजु मदनकृष्ण श्रेष्ठ मूपाहाँ कथं झायादीगु उगु ज्याझ्वःयात न्हूदँ सांगीतिक सनिलया रुपय् नं न्ह्यब्वःगु खःसा ज्याझ्वलय् नेपालभाषाया कलाकारिता ख्यलय् ताः ई निसें ज्वःमदुगु योगदान बिया वयाच्वनादीपिं नगीना जोशी वमहन्तलाल मल्लयात म्हतिं न्याद्वः तका नापं हनापौ लःल्हानाः सम्मानित याःगु खः ।

संगीत ख्यःया मेलोडी क्वीन धयातःम्ह दिपा महर्जन,रत्नशोभा महर्जन, राजेश शाक्य,एन्जीला सिंह, सुरज व्यञ्जनकार,सबिन बज्राचार्य, नील शाक्य,किशोरकुमार शाही व यमन श्रेष्ठलगायत आपालं कलाकारतय्सं थःथःगु सांगीतिक प्रस्तुति न्ह्यब्वःगु खः ।

अथेहेतुं नेपालभाषा संकिपा महोत्सवय् दुथ्याःगु १२ गू संकिपायात म्हतिं २५द्वःतकाया नापनापं दसिपौ नं लःल्हाःगु उगु ज्याझ्वलय् नेपालभाषा संकिपा महोत्सव ताःलाकेत ग्वाहालि याःपिंया नापनापं न्हूदँ सनिल११३९ ताःलाकेत ग्वाहालि याःपिं विज्ञापनदाता, कलाकार व व्यक्तित्वपिंत मतिनाया चिं कथं सुभाय्–पौ लःल्हाःगु खः ।

नेपाः आर्टिस्ट हेल्थ फण्डयात नं आर्थिक ग्वाहालि यायेगु तातुनाः जूगु उगु ज्याझ्वलय् व्यवसायी व समाजसेवी विश्वरत्न तुलाधरं हेल्थ फण्डया निंतिं थःगु पाखें १लाख ११ हजार व १११तका दां ग्वाहालि कथं लःल्हानादीगु खःसा उगु दांया चेक ईमेज च्यानलया महाप्रबन्धक रघुबरभक्त मानन्धरं लःल्हाना कयादीगु खः ।

मूपाहां मदनकृष्ण श्रेष्ठं नेपालभाषाया संगीत व संकिपा ख्यः बांलानाः वःगुलिं लसता प्वंकादिलसा मेम्ह पाहां व ज्याझ्वःया मू प्रायोजक महर्जन कम्प्लेक्सया कृष्णलाल महर्जनं नेवाः संगीत व संकिपा ख्यःयात अझ तब्यायायेमानिगु खँ न्ह्यथँसे थम्हं नं थुकी माःगु ग्वाहालि यायेगु बचं बियादिल ।

मेम्ह उगु ज्याझ्वः न्ह्याकादीम्ह नांजाःम्ह कलाकःमि व नेपालभाषा संकिपा समाजया संस्थापक नायः सुरेन्द्र तुलाधरं उगु हेल्थ फण्डय् न्हापाहे न्यागू लाख तका दयेधुंकूगु खँ न्ह्यथनादीगु खःसा उगु फण्डपाखें कलाकार मानकृष्ण वावायात छगू लखतका दां आर्थिक ग्वाहालि यायेधुनागु खँ नं वय्कलं न्ह्यथनादिल ।

 

तारिफ यायेमाःगु पक्ष
थुकथं क्वचाःगु उगु ज्याझ्वःयात दुवालेबलय् ताः ई लिपा हे जूसां नेपालभाषा फिल्म फेस्टिभलया समापन जूगुयात बांलाःगु खँ कथं कायेमाः, अले प्यताः इलय् न्ह्याइधकाः क्वछिनातःगु ज्याझ्वः यक्व लिमबाकुसे इलय् हे न्ह्याकूगुयात नं तारिफ यायेमाः । अथेहे तुं प्याखं हुलाच्वंगु इलय् हे थःगु वसः गुनावःसां भतिचा हे हरबराय् मचासे थःगु प्रस्तुति पूवंकादीम्ह रोजिना सुवालया धैर्ययात दुनुगलंनिसें तारिफ यायेमाः ।

ज्वर वःसां स्टेजय् हुलाप्याखं न्ह्यब्वयादीम्ह दिया श्रेष्ठया कुतःयात नं च्वछायेमा । प्रस्तुुतिया थुलि खँ बाहेक फिल्म फेस्टिभलय् ब्वति काःगु नेवाः फिल्मयात बिइधकाः क्वछिनातःगु म्हतिं नीन्याद्वः नीन्याद्वःतका उगु ज्याझ्वलय् लःल्हाःगुयात नं च्वछायेमा ।

मछिंगु खँ
छगू हे ज्याझ्वलं स्वता स्वता आज्जु ज्वंबलय् स्वकुमिपिं भतिचा अलमल जूगु खनेदत । न्यू इयर नाइट हनाः न्ह्याइपुके धकाः वःपिं स्वकुमितय् निंतिं फिल्म फेस्टिभलया समापन ज्याझ्वः व दसिपौ इनाज्याझ्वलं चिनातये मफुबलय् अन दसिपौ इनाच्वंगु इलय् हलय् स्वकुमित खनेमंत ।

अथेहेतुं भोगेन्द्र, रोजिना व रजनी जानाः हुलाप्याखं क्यंगु हे म्ये हाकनं नील शाक्य व दिपा महर्जनयात हायेके बीगु सिबें बरु म्येहालिपिंसं म्येहालाच्वंगु हे इलय् प्याखं नं ल्हुइका छ्वःगु खःसा अझ बांलाइगु खः, अले ई नं म्हं चाइगु खः ।

ज्याझ्वलय् छखे आशिष्मा नकःमि,आर्यम नकःमि,सबिन शाक्य,हृदयप्रसाद मिश्र, शोभा महर्जन थेंज्याःपिनिगु उपस्थिति खनेमदुसा मेखे नेवाःफिल्मया न्हापांम्ह हिरो जय श्रेष्ठ महर्जन अले लोकंह्वाःम्ह राजु महर्जननिसें कयाः न्हूपुस्ताया हिरोइनत निकी महर्जन, सलोना बज्राचार्य थेंज्याःपिनिगु उपस्थिति दःसां स्वकुमितसें वय्कःपिनिगु उपस्थिति बोध याये मखन ।

सुभाय्–पौ लःल्हायेगु ज्याय् निर्मलरत्न शाक्य, निरञ्जनरत्न शाक्य,विश्वरत्न तुलाधर व कृष्णलाल महर्जन,गोपालकाजी कायस्थ थेंज्याःपिंलिसें लिसें इमेज च्यानलया रघुबरभक्त मानन्धर व मूपाहां ख्यालिजुजु मदनकृष्ण श्रेष्ठया नापंनापं मेमेपिं स्टार फिगरयात नं ह्वःताः बिउगु खःसा स्वकुमितलिसे वय्कःपिनिगु स्वापू क्वातुइगु खः ।

अथेहेतुं थुगुसी सम्मानित जुइम्ह धकाः छुं ई न्ह्यः घोषित जुइधुंकूूम्ह महन्तलाल मल्ल सिरपाः ज्याझ्वलय् मथ्यंगुयात कयाः नं आपाःसिनं न्ह्यसःचिं थन । ज्याझ्वःया मूपाहांया रुपय् क्वछिनातःम्ह अले ज्याझ्वःया सुभाय् पौ लगायतया सकतां दसिपतिइ थःगु ल्हाःचिं तयातःम्ह नेपाल सरकार चलचित्र बिकास बोर्डया नायः मय्जु निकिता पौड्यालया अनुपस्थितियात आपाःसिनं बेक्वःमिखां स्वःगु दु ।

दकलय् लिपा
तःधंगु ज्या यायेबलय् छतानिता मगाःमचाः जुयाच्वनी । ज्याझ्वःया उद्देश्य बांलात कि अज्याःगु मगामचालंं छुं पाइमखु । नेपालभाषाया संकिपा व संगीत ख्यलय् ताः ई न्ह्यवंनिसें दिपाः मदयेक ज्या याना वयाच्वंम्ह नेपालभाषा संकिपा समाजया नायः सुरेन्द्र तुलाधर थःम्हेसिनं न्ह्याकूगु उगु ज्याझ्वःयात वय्कलं बांलाक व न्ह्याइपुक्क हे न्ह्याकूगु दु तर वय्कलं ईयात ध्यान तयाः भतिचा चिहाकलं जक न्ववानादीगु खःसा अझ बांलाइगु खः धकाः धाःपिं नं खनेदत ।

सम्बन्धित बुखँ

LEAVE YOUR COMMENTS