रेशम चौधरी खुल्ला जुइगु

येँ – टीकापुर काण्डया दोषी कथं प्रहरीं मालाच्वंम्ह नवनिर्वाचित सांसद लिसें थारु नेता रेशम चौधरीं थम्हं आः ससम्मान अदालतया न्ह्यःने वनाः बयान बिउ वनेगु खँ कनादीगु दु । अथे बयान बिउ वयेगु झ्वलय् थःत ज्वन धाःसा हानं न्यायया लागिं अदालत हे वनेगु खँ वय्कलं कनादिल ।
म्हिगः भूमिगत च्वनाच्वंगु थासं ‘नेपालभाषा टाइम्स’ लिसे खँ ल्हासें वय्कलं थ्व खँ कनादीगु खः । यक्वस्यां थःत सांसद पदया सपथ ग्रहण याइगु न्हि कुन्हु जक खुल्ला जूसां जिउ धकाः सुझाव बियाच्वंगु खःसां थः आः गिरफ्तारी बीगु लागिं मखु थःगु धापू तयेगु लागिं खुल्ला जुइत्यनागु खँ नं वय्कलं कनादिल ।

कैलाली जिल्लापाखें प्रतिनिधि सभाय् प्रत्यक्षपाखें निर्वाचित जुयादीम्ह सांसद चौधरीं धयादिल, ‘यदि बयान बिउ वनागु इलय् प्रहरीं ज्वन व अदालतं छुं मयात धाःसा थ्व देशया साढे ३४ हजार जनताया अपमान याःगु ठहर जुइ, नेपालय् अझ नं लोकतन्त्र मवःनि धइगु खँ दुनियां सीके खनी ।’
टीकापुर घटना वास्तवय् आन्दोलनया झ्वलय् राज्यपाखें ज्वंगु गलत नीतिया कारणं जूवंगु छगू घटना जक खः धासें उकिया हे लिधंसाय् थौं आदिवासी जनजातियात दमन यायेत स्वयाच्वंगु द्वपं नं वय्कलं बियादिल । उगु काण्डय् थःगु छुं हे दोष मदु धइगु खँ जनतां बिउगु मतपाखें हे पुष्टि जुइधुंकल धासें वय्कलं न्ह्यसः तयादिल, ‘जनताया थ्व मतयात मखु धाइम्ह सु ?’

आन्दोलनया इलय् प्रहरीलिसे ल्वापु ला २०४६ सालया आन्दोलनय् नं जूगु खः धासें वय्कलं धयादिल, ‘आः अज्याःगु हे घटना टीकापुरय् जूबलय् जक छाय् थपाय्सकं हल्ला ?’ टीकापुर घटनायात कयाः वय्कलं कनादिल, ‘भाद्र ७ गते टीकापुरय् थ्व घटना जुल, भाद्र ८ गते कफ्र्युया इलय् उगु लागाय् च्वंपिं थारूतय्गु ८८ खा छेँ च्याका बिल, पसः लुटे यात, होटेल तोडफोड यात, थारूतय्सं चले यानाच्वंगु एफएमया ज्याकू ध्वस्त याना बिल तर उकिया बारे धाःसा न प्रशासनं न्ववात, न मिडियां न्ववात । थ्व देशय् गज्याःगु पत्रकारिता जुयाच्वन ?’वय्कलं थः गन दु धकाः कने मछिंसां पिहां हे वये मफइगु स्थितिइ लानाच्वंगु धाःसा मखु धयादिल ।