बागमति प्रदेशया सरकारयात पूर्णता

येँ (नेपालभाषा टाइम्स)- बागमति प्रदेश सरकारं पूर्णता काःगु दु । मुख्यमन्त्री शालिकराम जम्मरकट्टेलं म्हिगः ११ म्ह दुजः दुगु मन्त्रिमण्डल गठन यानादीवं मन्त्रिमण्डलं पूर्णता काःगु खः । लिसें म्हिगः हे न्हू नियुक्त जूपिं मन्त्रीतय्सं शपथ ग्रहण नं याःगु दु । म्हिगः प्रदेश प्रमुख यादवचन्द्र शर्मा समक्ष न्हू नियुक्त जूपिं मन्त्रीतय्सं पद व गोपनीयताया शपथ काःगु खः ।

मुख्यमन्त्री जम्मरकट्टेलया मन्त्रिपरिषदय् डा. बाबुराम भट्टराई अध्यक्ष जूगु नेपाल समाजवादी पार्टीपाखें गंगानारायण श्रेष्ठ आन्तरिक मामिला व कानुन मन्त्री, माओवादीया युवराज दुलाल भौतिक पूर्वाधार विकास मन्त्री व कुमारी मोक्तान सामाजिक विकास मन्त्री जूगु दु ।

उकथं हे एमालेया जगन्नाथ थपलिया आर्थिक मामिला तथा योजना मन्त्री, केशवप्रसाद पोखरेल कृषि तथा पशुपन्छी विकास मन्त्री, एकालाल श्रेष्ठ श्रम रोजगार तथा यातायात मन्त्री, रामेश्वर श्रेष्ठ स्वास्थ्य मन्त्री नियुक्त जूगु खः । रामेश्वर श्रेष्ठ यल जिल्लापाखें निर्वाचित जुयादीम्ह खः ।

उकथं हे राप्रपाया उद्धव थापा खानेपानी, ऊर्जा तथा सिंचाई मन्त्री, डम्बर तामाङ पर्यटन, उद्योग तथा सहकारी मन्त्री व राजु बिष्ट वन तथा वातावरण मन्त्री नियुक्त जूगु दु । बागमति प्रदेशया सरकारय् मुक्कं झिंछम्ह जक मन्त्री नियुक्त यायेगु निर्णय याःगु खः ।