नीदँ–नीच्यादँ लिपा सेमिफाइनल थ्यंपिनि टक्कर

विश्वकपया निगूगु सेमिफाइनल कासा थौं इंग्ल्यान्ड व क्रोसिया दथुइ जुइ । इंग्ल्यान्डं थुगुसी २८ दँ लिपा न्हापांखुसी विश्वकपया सेमिफाइनल म्हितेत्यंगु दु । सन् १९९० य् इटलीइ जूगु सेमिफाइनलय् इंग्ल्यान्ड अर्जेन्टिना नाप बूगु खः । सन् १९६६ या विश्वकप विजेता इंग्ल्यान्ड सेमिफाइनलय् थ्यंगु थ्व स्वक्वःगुखुसी जक खः ।

सन् १९९१ य् युगोस्लाभियापाखें छुटे जुया वये धुंकाः क्रोसियां सन् १९९८ न्हापांखुसी विश्वकपय् छनोट जूगु खःसा उबलय् हे थ्व टिम सेमिफाइनल तक थ्यंगु खः । सन् १९९८ लिपा धाःसा क्रोसियां समूह चरण तकं पार यायेमफुत । रसियाय् जुयाच्वंगु विश्वकपय् धाःसा सकसितं अजू चायेक २० दँ लिपा क्रोसियां सेमिफाइनल तकया यात्रा यायेधुंकूगु दु ।

थ्व विश्वकपय् इंग्ल्यान्ड व क्रोसिया विश्वकप तक थ्यनी धकाः म्हो हे मनूतय्सं जक अनुमान यानातःगु खः । ल्याय्म्ह कासामिं जाःगु इंग्ल्यान्ड सन् १९९० लिपा थ्व पालय् सन्तुलित टिम कथं न्ह्यःने वःगु दु ।

मेखे क्रोसियां धाःसा मिडफिल्डय् उत्कृष्ट पकड कायम यासें न्हूगु पहया फुटबल म्हिताच्वंगु धासें तारिफ जुयाच्वंगु दु । थौं इंग्ल्यान्डया उत्कृष्ट कासामिपिं ह्यारि क्यान, रहिम स्ट्रलिङ लिसें क्रोसियाया इभान राकिटिक, लुका मोड्रिकपिनि धाथेंगु परीक्षा जुइ ।