लोकसेवाया परीक्षा पूर्वनिर्धारित तालिका कथं
येँ – सर्वोच्च अदालतं लोकसेवा आयोग पिकाःगु विज्ञापन रद्द यायेगु निंतिं अन्तरिम आदेश मबिइवं आयोगं विज्ञमानय् न्ह्यथनातःकथं हे परीक्षा संचालन जुइगु खँ धाःगु दु । लोकसेवाया विज्ञापन कथं दरखास्त तयेगु म्याद धाःसा मंगलवाः बहनी निसें हे क्वचाःगु दु । आयोगं आः न्हापा क्वःछिनातःकथं हे प्रक्रिया न्ह्याः वनेगु खँ धाःगु दु ।
आयोगं वंगु जेठ १५ गते ५१५ गू स्थानीय तहया निंतिं थ्यंमथ्यं ९ हजार पदया निंतिं विज्ञापन याःगु खः । तर लोकसेवाया थ्व विज्ञापन संविधान कथं मजू धकाः संसदया राज्य व्यवस्था तथा सुशासन समितिं विज्ञापन रद्द यायेत निर्देशन बिउगु खः । तर सर्वोच्चं धाःसा विज्ञापन दिकेम्वाः धकाः धाःगु खः ।
दोब्बर दस्तुर पुलाः दरखास्त तयेगु म्याद क्वचाये छन्हु न्ह्यव जक सर्वोच्चया फैसला वःगु खः । सर्वोच्चया थ्व फैसला लिपा आयोगयात ज्या न्ह्याकेगु निंतिं लँ चाःगु खः । आयोगया प्रवक्ता किरणराज शर्मां बिबिसी लिसे खँ ल्हासें धयादीगु दु, ‘सर्वोच्च अदालतं परीक्षा दिकेगु सम्बन्धी छुं आदेश मवःगुलिं विज्ञापन कथं फुक्क परीक्षा नियमित प्रक्रिया कथं हे न्ह्याः वनी ।
न्हापा दयेका तयागु कार्यतालिकायात हे कार्यान्वन यानाः गुगु गुगु इलय् तोके यानातःगु खः व हे इलय् परीक्षा संचालन जुइ ।’थ्यंमथ्यं ९ हजार पदया निंतिं प्यंगू त्या लाख मनूतय्सं आवेदन फारम भरे याःगु दु । थ्व ल्याः अनलाइनपाखें फारम जायेकूपिनि ल्याः खः । आः फारम कथं शुल्क पूपिनि आधारय् दर्खास्त बिउपिं गुलि दइ धयागु सीदइगु खँ धाःगु दु ।
दरखास्त पुलेगु ई बुधवाः बहनी तक तयातःगु दु ।आयोगं थीथी जिल्लाय् दुगु थःपिनि झिंप्यंगू कार्यालय मार्फत आवेदकतय्त पायक जुइ कथं परीक्षा केन्द्र तोके यानातयागु खँ प्रवक्ता शर्मां धयादीगु दु ।
वय्कलं धयादीगु दु, ‘फुक्कं झिंप्यंगुलिं कार्यालयय् थःथःपिनि हे विज्ञापन नम्बर दु । थुपिं कार्यालय अन्तर्गत थःगु क्षेत्रय् लाःगु थीथी स्कुलय् परीक्षा केन्द्र तोके यानाः परीक्षा संचालन याइ ।’आयोगं वइगु साउनया न्हापांगु वाः निसें भदौ तकया दुने लिखित परीक्षा कायेत्यंगु दु ।
LEAVE YOUR COMMENTS