रियलया नितिं बेन्जेमाया कीर्तिमान प्रदर्शन

म्याड्रिड (एजेन्सी) – करिम बेन्जेमा रियल म्याड्रिडया नितिं दकलय् अप्व: गोल याम्ह कासामिया धलय् न्यागूगु थासय् थ्यंगु दु । वया निगू गोलया ग्वाहालिं रियलं बिहीवा: बहनि भ्यालेन्सियायात अपुक ३-० बुकल । थ्व कासा त्यायेवं रियलं लिगया शीर्ष स्थानय् च्वंगु बार्सिलोनानापया दूरी हाकनं निगू ल्याखय् क्वका:गु दु ।

फ्रान्सेली ३२ दँया बेन्जेमां रियलया नितिं सकतां कथंया धेंधेंबल्लाखय् या:गु गोलया ल्या: २४३ थ्यंगु दु । वं थुकिया झ्वलय् फेरेक्न पुस्कासयात ल्युने लाकूगु ख: । एडन हेजार्डया पासय् न्हापांगु गोल यायेवं बेन्जेमां या:गु निगूगु व्यक्तिगत गोल तसकं सुन्दर सावित जुल । थुकिया दथुइ एसेन्सों कासाया निगूगु गोल यात । थ्व प्रदर्शन लिपा बेन्जेमायात रियलया इतिहासय् दकलय् उत्कृष्ट स्ट्राइकरमध्ये छम्ह कथं काइगु जुइ ।

विहीवा:या मेगु कासाय् एलाभेसं रियल सोसिडाडयात २-० बुकल ।

रियलया नितिं दकलय् अप्व: गोल या:पिं कासामि
१. क्रिस्टियानो रोनाल्डो – ४५० गोल
२. राउल – ३२३ गोल
३. अल्फ्रेडो डि स्टेफानो – ३०८ गोल
४. सानटिलाना – २९० गोल
५. करिम बेन्जेमा – २४३ गोल
६. फेरेन्क पुस्कास – २४२ गोल