एम्बाप्पेयात पनेत उरुग्वे तयार

एजेन्सी- विश्वकपया न्हापांगु क्वार्टरफाइनलय् थौं फ्रान्स व उरुग्वें म्हितेत्यंगु दु । उरुग्वे विरुद्धया कासाय् अर्जेन्टिनायात निगू गोल थ्वाःम्ह केलियन एमबाप्पें हे फ्रान्सया निंतिं मू भूमिका म्हितीगु जुइ । उरुग्वेया स्टार कासामि लुइस स्वारेजं एम्बाप्पेयात पनेत थःपिं तयार दुगु खँ धाःगु दु । थुुगु विश्वकपया प्यंगू कासाय् छगू जक गोल नःगु उरुग्वेया डिफेन्स लाइन फ्रान्स विरुद्ध नं उतिकं हे बल्लाइगु खनेदु । मेखे फ्रान्सया निंतिं धाःसा स्वारेज हे खतरा जुइफु । उरुग्वेया निंतिं गोल यानाच्वंम्ह इडिन्सन काभानी चोटग्रस्त जूगुलिं फ्रान्सया निंतिं थ्व धाःसा लसताया खँ जुइफु ।

मेखे थौं हे लिबाक्क ब्राजिल व बेल्जियम दथुइ मेगु क्वार्टरफाइनलय् जुइ । जापान विरुद्धया प्रिक्वार्टरफाइनलय् निगू गोलं लिउने लायेधुंकाः नं त्याकावःगु बेल्जियम थौंकन्हय् फुटबलया स्वर्ण पुस्ताय् दु । ब्राजिलया डिफेन्सया लाइनया निंतिं बेल्जियम फुक्क कासामि उलि हे खतरनाक जुइफु । मुख्यतः रोमेलु लुकाकु व कप्तान इडेन हजार्ड ब्राजिलया डिफेन्सयात कपाः स्याकीगु जुइ । मेखे बेल्जियमया निंतिं धाःसा मुख्यतः नेयमार हे चुनौति जुइ । तर ब्राजिलया सकलें कासामि गोल यायेत सक्षम दुगुलिं बेल्जियम गोल यायत जक मखु गोल मजुइकेत नं होस यायेमाःगु जुइ ।