
जेस लिन्गार्ड, मिडफिल्डर, इंग्ल्यान्ड
म्यानचेस्टर युनाइटेडया जेस लिन्गार्ड एट्याकिङ मिडफिल्डर कथं क्लब व इंग्ल्यान्ड राष्ट्रिय टिमय् म्हिता वयाच्वंम्ह खः । न्हय्दँया उमेरय् म्यानचेस्टर युनाइटेड एकेडेमिइ दुहां वनाः अनं ब्वलना वःम्ह लिन्गार्ड इंग्ल्यान्डया अन्डर १७ व अन्डर २१ य् म्हिता वयेधुंकूम्ह खः । राष्ट्रिय टिमय् धाःसा सन् २०१५ या नोवेम्भरय् डेब्यु याःगु खःसां सन् २०१६ य् माल्टा विरुद्धया मैत्रीपूर्ण कासाय् जक मैदानय् कुहां वनेखंगु खः ।
वं इंग्ल्यान्डया निंतिं न्हापांगु गोल धाःसा वंगु मार्चय् नेदरल्यान्डविरुद्ध जूगु कासाय् तिनि याःगु खः । म्यानचेस्टर युनाइटेडया निंतिं थ्व सिजनय् जक ४८ गू कासा म्हिताः १३ गोल याःम्ह २३ दँया लिन्गार्डं जारी विश्वकपय् नं पानामाविरुद्धया कासाय् गोल यायेधुंकूगु दु ।
रिकार्डो रोड्रिग्वेज, डिफेन्डर, स्वीट्जरल्यान्ड
रिकार्डो रोड्रिग्वेज फुटबल मैदानय् छम्ह जब्बरम्ह कथं म्हसिका दुम्ह डिफेन्डर खः । इटलीयन क्लब मिलानं लेफ्ट ब्याकं म्हिता वयाच्वंम्ह रोड्रिग्वेजया म्हसीका थुलि जक मखु । वयात शक्तिशाली हेडिङ यायेगु, पिनप्वाइन्ट क्रस बीगु निंतिं म्हसिउ । उलि जक मखु पेनाल्टि थ्वायेगु क्षमताया निंतिं रोड्रिग्वेजयात लुमंकेगु याः ।
स्पेनिस अबु व चिलिया मां पाखें बूम्ह रोड्रिग्वेजं सन् २०१० निसें एफसी जुरिख पाखें थःगु व्यावसायिक फुटबल न्ह्याकूगु खः । सन् २०१४ य् स्वीस फुटबल अफ दि इयर जूम्ह रोड्रिग्वेजं स्वीस राष्ट्रिय टिमपाखें पीगू कासा म्हिते धुंकूगु दु । वं सन् २०१४या विश्वकप, २०१६ या युरोकप व २०१२ ओलम्पिकय् स्वीस राष्ट्रिय टिमं म्हितूम्ह रोड्रिग्वेज सन् २००९ य् स्वीट्रल्यान्डपाखें अन्डर १७ या विश्वकप त्याकेधुंकूगु दु ।
LEAVE YOUR COMMENTS