इपीएल उपाधि यलं त्याकल

येँ- एभरेष्ट प्रिमियर लिग (इपीएल) ट्वान्टी–२० क्रिकेटया उपाधि ललितपुर प्याट्रियट्सं त्याकूगु दु । म्हिगः उपाधिया निंतिं जूगु फाइनलय् नेपाली राष्ट्रिय टोलीया उपकप्तान ज्ञानेन्द्र मल्लया कप्तानीइ दुगु ललितपुरं शरद भेषवाकरया नेतृत्वय् दुगु भैरहवा ग्लाडिउटर्सयात १४ रनं बुकाः उपाधि त्याकूगु खः ।

सर्वाधिक पुरस्कार राशिया उपाधिलिसें ललितपुरं २५ गू लाख तका ल्हातय् लाकूगु दुसा उपविजेता भैरहवां १० लाखय् चित्त बुझे याःगु दु । भैरहवा निक्वःखुसी उपविजेता जूगु खः । थ्व स्वयां न्ह्यः थगुने जूगु कासाय् नं भैरहवा उपविजेताय् सीमित जूगु खः ।

थनया त्रिवि क्रिकेट मैदानय् जूगु कासाय् टस बुनाः न्हापां ब्याटिङ याःगु ललितपुरं भैरहवायात १५६ रनया लक्ष्य बिउगु खः । तर भैरहवां २० ओभरय् ९ विकेटया क्षतिइ १४१ रन जक दयेकेत सफल जुल । टस बुनाः न्हापां ब्याटिङ याःगु ललितपुर १९ दशमलव १ ओभरय् १५५ रन दयेकाः अलआउट जूगु खः ।

ललितपुरया जयकिशन कोल्शावालां अर्धशतकीय पारी म्हितूगु खःसा कासाय् प्लेयर अफ द म्याचया उपाधि ललित राजवंशी व प्लेयर अफ द सिरिजया उपाधि रविइन्दर सिंहं प्राप्त यात ।