दिलशोभाया इच्छा दक्वं जिल्लाय् सेवा

मधु श्रेष्ठ

थ्व संसारय् जन्म जुइपिं मनू जक मखु, गुलि नं पशुपंछि व जीवजगत दु, व दक्वं मचांनिसें कयाः बैंश वने धुंकल कि छन्हु बुराबुरी जुइ । थ्व प्राकृतिक नियम हे खः । मनू जुयाः जन्म जुइधुंकाः मचाबलय् इमिगु जीवन गुलि न्ह्यइपुसे च्वनीगु खः, ज्याथजिथिया अवस्थाय् थ्यंकाः मानसिक व शारीरिक रुपं शरीर कमजोर जुया वनी ।

अज्याःगु इलय् इमित सहाराया यक्व आवश्यकता जुया वइ । तर, थः हे मस्तय्सं तकं अज्याःगु इलय् थ्यंकाः थः मांअबुयात वास्ता मयाइगु जक मखु, छेँय् नं पितिना छ्वयेगु व वय्कःपिंत त्वःताः विदेश वा मेगु हे थासय् वनाः च्वंवनीपिं निर्दयी मनूत नं झीगु देशय् दु ।

थथे हे आपालं दुःख सियाच्वंपिं व सुं हे मदुपिं ज्याथजिथिपिंत नं थः हे छेँजः सरहः भाःपियाः छेँय् हयाः नकेत्वंकेगु नापं ल्वचं कःपिंत आवश्यककथं वासः यायेगु व थः हे मांअबुयात थें हे माया मतिना यानाः लहीगु ज्या याना वयाच्वनादीम्ह छम्ह अतिकं हनेबहम्ह व्यक्तित्व मय्जु खः दिलशोभा श्रेष्ठ ।

वि.सं. २०१० सालय् येँया थानकोटय् अबु हर्षनारायण व मां लक्ष्मीमायाया क्वखं वय्कःया जन्म जूगु खः वय्कःया स्वम्ह केहें व निम्ह किजा दु । २०२८ सालय् वय्कःया इहिपा जुल । मतिना यानाः हे इहिपा जूगु खःसां काय मदुगु धइगु त्वहः चिनाः वय्कःया जहानं वय्कःयात त्वःताबिल । मय्जु दिलशोभाया छम्ह हे जक म्ह्याय् दु । वय्कः थौंकन्हय् अमेरिकाय् च्वंच्वनादी ।

छम्ह उच्च शिक्षा कायेमखंम्ह याकःमिसायात थःगु जीवन निर्वाह यायेत हे थाकुगु इलय् नं वय्कलं सहारा मदयाः बेसहारा जुयाच्वंपिं मांपिंत तकं छेँय् हयाः लहिना दिल । थुकथंया समाजसेवा यायेगु प्रेरणा गनं वल धइगु न्ह्यसःया लिसलय् मय्जु दिलशोभां धयादी, ‘थुकथं मांपिनिगु सेवा यायेगु प्रेरणा जिं थः हे अबुपाखें कयागु खः, छाय्धाःसां बाःनं न्ह्याबलय् त्वालय् च्वंपिं बुराबुरीपिं याकःचा जुयाच्वंगु व सुं मदुगु इएलय् च्या त्वंकेगु, कौला याकेगु, अज्याःपिं पसः वना वइगु इलय् झ्यातुक ज्वना वल धाःसा थम्हं हे छेँय् थ्यंक यंकाः सामान तयाबीगु वा छुं नं कथंया ग्वाहालि माल धाःसा बाःनं याना च्वनादीगु ।’

थुकथं वय्कःया बाःनं छम्ह समाजसेवी हे जुयाच्वन । वय्कःया अबुया प्रेरणां हे वय्कः नं थ्व ख्यलय् लगे जुयादीगु खः ।२०५२ सालंनिसें दुःखीपिं मांपिं लहीगु यानादीगु खःसा २०५६ सालय् वयाः ‘आमा केन्द्र’या नामं वय्कलं संस्था हे दर्ता यानादीगु खः । न्हापां ला ‘आमा केन्द्र’या निंतिं वय्कलं आपालं दुःख नं सियादीगु दु । थ्व हे झ्वलय् मय्जु दिलशोभां धयादी, ‘अबलय् न्ह्याथे यानानं दुःखीपिं मांपिंत सेवा यायेगु जिगु इच्छायात परमेश्वरं हे पूवंका बिउगु खः ।’

अले वय्कःया थ्व ज्याय् वय्कःया किजा केहेंपिंसं नं यक्व पूmचाःगु ग्वाहालि याःगु खँ नं कनादी । मय्जु दिलशोभाया समाजसेवां यानाः वय्कःयात म्हमसिउपिं शायद म्हो जक दु जुइ । अथे खःसां बांलाःगु ज्या याइपिंत कुं खिनीगु चलन ला झीगु थ्व समाजय् मदुगु मखु । न्ह्यागु हे जूसां वय्कलं थःगु समाजसेवाया ज्यायात निरन्तरता हे बिया वयाच्वनादिल ।

उलि जक मखु थःगु समाजसेवायात न्हापां स्वयां आः यक्व हे बांलाकादीधुंकूगु दु । थ्व सन्दर्भय् वय्कलं धयादी, ‘थौंकन्हय् ‘आमा केन्द्र’ रविभवनय् जक सीमित जुयाच्वंगु मदु । गुरुजुधाराय् नं चायेकागु दु । २०७२ सालया तःभुखाचय् लानाः पीडित जूपिं व मांअबु मदुपिं मस्तय् निंतिं नखिपोटय् नं संस्था चायेकेधुंगु दु । अथे हे दुःखीपिं बाःपिनिगु निंतिं धकाः थिमिया बालकोटय् नं छगू संस्था चायेकेगु विचाः यानाच्वनागु दु ।’

यलया नखिपोटय् तयातःपिं सकलें मस्तय्त ज्ञानकुञ्ज स्कुलं सितिकं आखः ब्वंका बिउगु वय्कलं कनादी ।थ्व ‘वृद्धावस्था व्यवस्थापन तथा सामाजिक कल्याण गुथि’, ‘आमा घर केन्द्र’ या शाखात मेमेगु थासय् नं यक्व दयेधुंकूगु दु । गथेकि नगरकोट, हेटौंडा, नारायणघाट आदि थीथी थासय् दु । थ्व सन्दर्भयात कयाः वय्कलं धयादी, ‘देय्या ७७ गुलिं जिल्लाय् दुःख सियाच्वंपिं, दुःखी मांअबुपिनिगु सेवा यायेगु इच्छा दु ।’

थथे हे चाँगुनारायणय् बुराबुरीपिनिगु निंतिं धकाः ‘द केयर’ दयेकेगु व बाःपिनिगु निंतिं बालकोटय् ‘बाः घर’ दयेकेगु विचाः यानाच्वनादीम्ह वय्कलं परमेश्वरया कृपां थ्व ज्या नं याकनं हे पूवनीगु आशा यानाच्वनादीगु दु । छुं नं संस्था वा समाजसेवाया निंतिं दकलय् मुख्य खँ आर्थिक स्रोतया आवश्यक जुइगु ला जु हे जुल । थुलिमछिं मांपिं अले मस्तय्त नकेगु, त्वंकेगु, वासः यायेगु लागि छुं व्यवस्था ला याये हे माल ।

थ्व सन्दर्भय् वय्कलं धयादी, ‘न्हापा थें आः जितः संस्था चले यायेत थाकु मजुल, छाय्धाःसां न्हियान्हिथं धइथें हे सेन्ट जेभियर्स स्कुल, रातो बंगला स्कुल, गणेशमान कलेज, ग्रीनतारा नर्सिङ होम, गोल्डेन गेट आदिया विद्यार्थीत वयाः मांपिनिगु सुसाःकुसाः यायेगु, वसः हिया बीगु, च्या दायेकाः त्वंकेगु नापं न्ह्यागुकथंया ज्या जूसां याना वनीगु जुयाः यक्व अःपु ।’ उलि जक मखु छु नके, छु त्वंके धकाः नं चिउताः कायेम्वाः । दातापिनिगु ग्वाहालिं यक्व हे गाः ।

छाय्कि गबलें जन्मदिं, गबलें मचा बूगु लसताय्, श्राद्ध, मांअबुया ख्वाः स्वयेगु दिं आदि दिनय् नं मनूतय्सं नके हइगुया नापनापं मेगु नं माःमाःगु चिजबिज हयाः ग्वाहालि यानाच्वंगु खँ वय्कलं कनादिल । अज्याःपिं दातात विदेशी मखसे झी हे नेपाःमित जुयाच्वन ।
‘आमा केन्द्र’या मेमेगु शाखात नं दयेधुंकल । मस्तय्गु निंतिं अनाथ आश्रम अले बाःपिनिगु निंतिं तकं वइगु जुइधुंकल ।

थुपिं सकसितं व्यवस्थापन यायेत जूसां सामाजसेवीत पक्कां हे आवश्यक जुइ । थुकियात कयाः वय्कलं धयादी, ‘संस्थाया निंतिं धकाः हे निम्ह स्वम्ह किजापिंसं यक्वं ग्वाहालि यानाच्वनादीगु दु । जि मदयेधुंकाः वय्कःपिंसं हे संस्थायात न्ह्याकी ।’ थुकथं स्वनिगलं पिने कञ्चनपुर लगायत मेमेगु थासय् नं थ्व हे संस्थाया नामं चले याना वयाच्वंगु दुसा मेमेगु थीथी थासय् च्वंपिंसं नं संस्था चायेकेत इच्छा यानाच्वंगु खँ वय्कलं कनादी ।

समाजसेवाया झ्वलय् मय्जु दिलशोभा श्रेष्ठं आपाल विदेशया नं भ्रमण यानादीधुंकूगु दु । वय्कलं धयादी, ‘अमेरिका, जापान, कोरिया आदि देशय् भ्रमण यायेगु अवसर चूलाःगु दु ।’ समाजसेवी मय्जु दिलशोभाया योगदानयात समाजं नं आपालं कदर यायेधुंकूगु दु । दर्जनौं स्वयां नं अप्वः संघसंस्थां वय्कःयात सम्मान यानाः कदर पत्र लःल्हायेधुंकूगु दु ।

छुं छुं सफूया कोर्सय् तक नं मय्जु दिलशोभाया जीवनी दुथ्याकेधुंकूगु दु । ‘सुं नं मांअबुपिं सतकय् द्यने मालीगु अवस्था मवयेमाः व मिखाय् ख्वबि मदयेमा’ धइगु उच्च विचाः दुम्ह नेवाः समुदायया दिलशोभा श्रेष्ठया योगदानयात झी सकसिनं अनुशरण याना वने फतः धाःसा यक्व बांलाइ ।