ने. सं. ११४३ ञलागा चौथी -

भारतया कोरोना नेपाः दुहां वयेगु शुरु

येँ (नेपालभाषा टाइम्स)-भारतया थीथी शहरय् कोरोना जूपिं मनूतय् ल्याः अप्वया वःलिसे उकिया लिच्वः नेपालय् नं लायेगु शुरु जूगु दु । वंगु छुं ई न्ह्यवंनिसें नेपालय् कोरोना जूपिनि ल्याः अप्वयाच्वंगु खःसा म्हिगः नं थ्व जारी हे जुल ।

स्वास्थ्य तथा जनसंख्या मन्त्रालयया कथं म्हिगः १५९१ म्ह मनूयाके परीक्षण याःगुली १३६ म्हेसिके कोरोना सङ्क्रमण जुयाच्वंगु पुष्टि जूगु खः ।
थ्व ल्याःया नापनापं आः नेपालय् सक्रिय संक्रमितया ल्याः ३९० म्ह थ्यंगु दु । म्हिगः ११३ म्हेसिके सङ्क्रमण लूगु खः । मन्त्रालयया कथं थौंकन्हय् कोरोना जुयाः संस्थागत आइसोलेसनय् २७ म्ह, आइसियुलय् प्यम्ह व भेन्टिलेटरय् छम्हेसिया उपचार जुयाच्वंगु दु ।

म्हिगः ६४ म्ह विरामी कोरोना मुक्त जुयाः छेँय् लिहां वंगु खँ नं मन्त्रालयं धाःगु दु ।

थुकिया लिसें मन्त्रालयं कोरोना भाइरसया सङ्क्रमण अप्वया वनाच्वंगुलिं आः मनूतय्त खोप कायेगु लागिं इनाप याःगु दु । नेपाःया जःलाखःला देय् भारतय् न्यना वनाच्वंगु कोरोना भाइरसया न्हूगु भेरियन्ट ओमिक्रोन एक्सविवि. १.१६ नेपालय् नं खने दया वःगु दु । थुकिं यानाः भारतया कोरोना नेपालय् सरे जुयाच्वंगु प्रमाणित जूगु खँ धाःगु दु ।

नेपाः भारत खुला सीमां यानाः शून्यय् कुहां वयेधुंकूगु संक्रमितया ल्याः आः हानं थहां वनेगु शुरु जूगु खः । संक्रमितया ल्याः थहां वनेवं अस्पतालत सतर्क अवस्थाय् च्वनेधुंकूगु खँ धाःगु दु ।