अनुगमन दित, गोदाम चायेकल
येँ – बजार अनुगमनपाखें आतंकित जुयाः बन्द याःगु व्यवसायीतय् पसः व गोदाम चायेकूगु दु । सरकार व व्यवसायी दथुइ सहमति लिपा कुलेश्वरय् च्वंगु खाद्यान्न गोदाम चायेकूगु खः । खाद्यान्न व्यापारी व अनुगमन विभाग प्रमुख योगेन्द्र गौचन दथुइ सहलह लिपा तत्काल अनुगमन ज्यायात दिकाः दकलय् न्हापां उपभोक्तायात निं सचेत यायेगु कथं सहमति जूगु खँ व्यापारी देवेन्द्रभक्त श्रेष्ठं ‘नेपालभाषा टाइम्स’ यात कनादिल ।
वय्कलं आः तक उपभोक्तायाके सामान डेड स्पायर जूगु खः कि मखु धकाः स्वयेगु बानी तकं विकास मजूगुलिं न्हापां थज्याःगु ज्या निं यायेमाःगु व वयां लिपा थज्याःगु समस्या बुलुहुँ चिला वनीगु बारे सहलह जूगु खँ कनादिल । वंगु शुक्रवाः सहमति लिपा अनुगमन यायेगु ज्या दिउगु जानकारी नं वय्कलं बियादिल ।
वंगु छुं न्हिं न्ह्यः सरकारं बजाः अनुगमनया नामय् छुं व्यापारीतय्त ज्वनेवं कुलेश्वरया थोक व्यापारीतय्सं पसः बन्द यानाः विरोध याःगु खः । थुकिं यानाः बजारय् केँ, जाकि, चिनी, छुचुं थेंज्याःगु सामाग्री अभाव जूगु खः । मेखे अनुगमनय् दुथ्याःपिं सरकारी कर्मचारीत नं अनुगमनया ज्याय् उलि इच्छुक मजुयाच्वंगु खँ सीदुगु दु ।
अनुगमनय् दुथ्याःम्ह छम्ह कर्मचारीया कथं थ्व ज्या अनुगमन स्वयां नं जनतायात झंगः लायेगु कथं जुयाच्वंगु दु । जनताया दथुइ सरकारं बांलाक ज्या यानाच्वनागु दु धकाः क्यनेत जक अनुगमन जुयाच्वंगु खँ नं वय्कलं कनादिल । अनुगमनय् छुं खुद्रा व्यापारीयात ज्वंसां तःधंगु डिष्ट्रिब्यूटर्सतय्त धाःसा थी तकं मफुगु द्वपं खुद्रा व्यापार संघया अध्यक्ष पवित्र वज्राचार्यं बियादीगु दु ।
LEAVE YOUR COMMENTS