खुसि मापदण्ड विरुद्ध संघर्ष
येँ (नेपालभाषा टाइम्स)÷येँया बागमति व बिष्णुमति खुसिसिथं ४० मिटर अले मेमेगु खुसि सिथं २० मिटर लागा तक छेँ दने दइ मखु धकाः अदालतं याःगु फैसला विरुद्ध स्वनिगःया भूमि पीडिततय्सं आन्दोलन याइगु जूगु दु ।
छुं न्हि न्ह्यः जक अदालतं थ्व फैसला यायेवं येँ महानगरपालिकाया मेयर बालेन साहं फैसलायात लसकुस यासें थुकियात येँ मनपां कार्यान्वयन यायेगु जुइ धकाः प्रतिक्रिया बियादीगु खः । तर खुसि सिथय् थ्व मापदण्ड दुने लाःपिं स्थानीय भूमिथुवाःतय्सं धाःसा थुकिं यानाः थःपिनि भूमि मूल्यहिन जुइगु धासें यदि थ्व फैसला कार्यान्वयन यायेगु खःसा सरकारं थःपिंत मुआब्जा बीमाः धकाः माग याःगु दु ।
सरकारं छुं नं प्रयोजनया लागिं सुयां भूमि काये माल धाःसा उकिया मुआब्जा बियाः जक अधिग्रहण याये दइ धकाः सर्वोच्च अदालतं हे फैसला यानातःगु दु ।
खुसि सिथय् ४० मिटर व २० मिटर लागा तक छेँ दने दइ मखु धकाः अदालतं याःगु थ्व आदेशं यानाः स्वनिगःया लाखौं मनूत पीडित जुइगु खँ धाःगु दु । अझ स्वनिगःया आपालं खुसि सिथय् बसोवास यानाच्वंपिं स्थानीय नेवाःत हे जूगु कारणं थ्व फैसलां दकलय् अप्वः नेवाःत हे प्रभावित जुइगु खँ नं धाःगु दु ।
येँया १७, १९, २० आदि वडाय् आः नं सलंसःदँ न्ह्यवंनिसें बसोवास यानाच्वंपिं नेवाःत यक्वं दनि । उमिके थःगु जग्गाया लालपूर्जा धाःसा मदु । उकिं उमिसं थःपिंत स्वबासी कथं लालपूर्जा बीमाः धकाः माग याना वयाच्वंगु दु । यदि आः खुसि सिथय् छेँ दने दइ मखु धइगु मापदण्ड लागू जुल धाःसा अन छेँ दने जियाः उपिं अनं विस्थापित जुइ माली । छुं जुयाः सरकारं मुआब्जा हे बिल धाःसां नं लालपूर्जा मदुगु कारणं उमिसं उगु मुआब्जा नं काये खनी मखु ।
थुकिया नापं आः सतक तबाला यायेगु धकाः दयेकातःगु मापदण्ड नं खारेज यायेत माग याःगु दु । सरकारं येँया थीथी लागाय् सतक तब्या यायेगु धकाः लँ सिथय् छेँ दनेगु रोक्का यानातःगु दु । तर मुआब्जा बी मफुगु कारणं जग्गाथुवाःतय्त अनं विस्थापित नं याये मफुनि । थुकिं यानाः अज्याःपिं जग्गाथुवाःत थःगु हे जग्गाय् नं छेँ दनाः च्वने फयाच्वंगु मदुनि । उकिं सतक विस्तार पीडिततय्सं कि मुआब्जा बियाः थःगु जग्गा अधिग्रहण याना छ्व, कि मखुसा अन यानातःगु निर्माण रोक्का फुकुवा याना बिउ धकाः नं माग यानाच्वंगु दु ।
थुपिं हे खँयात कयाः येँय् छुं ई न्ह्यः सरोकारवालातय् सहलह मुँज्या जूगु खः । थौं नं थ्व मुँज्या च्वनेत्यंगु दु । मुँज्यापाखें थुकिया विरुद्ध संघर्ष समिति गठन यायेफुगु खँ मुँज्याया तयारी याना च्वनादीम्ह न्ह्यलुवा सुमन साय्मिं कनादीगु दु ।
मनपा हे थुने माली !
अदालतया थ्व आदेश पालना यात धाःसा येँ मनपाया थौंकन्हय् ज्याकू दुगु छेँ काठमाडौं प्लाजा हे थुने माली । थ्व छेँ तुकुचा खुसिया सिथय् हे लानाच्वंगु दु । अदालतया आदेशय् बागमति व बिष्णुमति बाहेक मेगु खुसि सिथं २० मिटर तापाक तक छेँ दने दइ मखु धयातःगु दु । मनपा ज्याकू तुकुचाया १० मिटर दुने लाः ।
LEAVE YOUR COMMENTS