मरुसतः पुनःनिर्माणया निंतिं चा व अपा परीक्षण

येँ – सरकारं तःभुखाचं क्षति जूगु विश्व सम्पदास्थलय् लाःगु मरुसतलय् प्रयोग जुइगु चा व अपाः परीक्षणया निंतिं परीक्षण केन्द्रय् च्वंगु दु। पुनःनिर्माणया ज्या न्ह्याकेगु निंतिं प्रक्रियाय् वनाच्वंगु मरुसतः पुनःनिर्माणया निंतिं उकी प्रयोग जुइगु चा व अपाया गुणस्तर परीक्षणया निंतिं केन्द्रय् छ्वःगु खः।

मरुसतः पुनःनिर्माणया निंतिं जनस्तरं गठन यानातःगु काष्ठमण्डप पुनःनिर्माण समितिं करिब लछि न्ह्यः क्षमा पुजा याये धुंकाः थौंकन्हय् पुनःनिर्माणय् प्रयोग जुइगु सामग्री चूलाकेगु ज्या यानाच्वंगु दु। थ्व झ्वलय् मरुसतः पुनःनिर्माणय् प्रयोग जुइगु चा व अपाया गुणस्तर परीक्षणया निंतिं केन्द्रय् छ्वःगु खः।

वइगु भदौ महिनानिसें मरुसतः पुनःनिर्माणया ज्या न्ह्याकेगु तयारी यानाच्वंगु समितिं चा व अपाया गुणस्तर परीक्षणया निंतिं केन्द्रय् छ्वयेधुंकाः आः सिँ मुंकेगु ज्या जुयाच्वंगु दु।वि.सं. २०७२ साल बैशाख १२ गतेया विनाशकारी तःभुखाचं पाःताः जुइक दुना वंगु मरुसतः पुनःनिर्माणया निंतिं वंगु बैशाख ३१ गते छगू क्षमा पुजा याःगु खः।

परीक्षणया निंतिं केन्द्रय् छ्वःगु चा व अपाया गुणस्तर मापन लिपा उकिया हे लिच्वःया लिधंसाय् मरुसतः पुनःनिर्माणया निंतिं मेमेगु सामग्री नं संकलन यायेगु व वयां लिपा पुनःनिर्माणया ज्या नं न्ह्याकेगु समितिया अध्यक्ष तकं जुयाच्वनादीम्ह प्रदेशसभा सदस्य राजेश शाक्यं कनादिल।

झिंनिगूगु शताब्दीइ जुजु लक्ष्मीनरसिंह मल्लं निर्माण याकूगु व बिसेत नांया मनुखं कल्पतरुयात नियन्त्रणय् कयाः छमा हे सिमाया उपलब्ध याकेगु धकाः बचं ल्हाकेधुंकाः कल्पतरुं बिउगु सिमाया सिँपाखें हे मरुसतः दयेकूगु धइगु धापू दु। मरुसतः मूर्तिविहीनया रुपय् दयेकूगु खःसां लिपा अन गोरखनाथ व प्यम्ह गणेद्यःया मूर्ति थापना याःगु खः।

तःभुखाय् ब्वये धुंकाः छुं दिं लिपा बेलायतया दुरहाम विश्वविद्यालयया अनुसन्धानकर्तातय्सं याःगु छगू खोज अध्ययन कथं मरुसतः न्हय्गूगु शताब्दी दयेकूगु धइगु पत्ता लगे याःगु खः। अपा व चा परीक्षणया लिच्वः करिब २० न्हुया दुने वइगु व वयां लिपा भदौ महिनाय् निर्माण शुरु यानाः प्यदँया दुने दयेके क्वचायेकेगु लक्ष्य कयातःगु दु।