मंकाः खलःया दबूछेँ शिलान्यास

शनिवाः मेयर विद्यासुन्दर शाक्यपाखें शिलान्यास याइगु ज्याझ्वः

येँ – नेपालभाषा मंकाः खलःपाखें ताः ई न्ह्यवंनिसें निर्माण यायेगु धकाः उद्देश्य तया वयाच्वंगु दबूछेँ अन्ततः धस्वाइगु जूगु दु । थ्वहे वइगु शनिवाः छगू ज्याझ्वःया दथुइ येँ महानगरपालिकाया मेयर विद्यासुन्दर शाक्यं उकिया शिलान्यास यानादीगु जूगु दु । येँया वडा नं. १५ स्थित विजेश्वरीइ होटल वज्रया लिउनेसं च्वंगु मंकाः खलःया थःगु हे जग्गाय् थ्व दबूछेँ निर्माण यायेत्यंगु खः ।

अन मंकाः खलःयात झी कविकेशरी चित्तधर हृदयं दान बियातःगु व मंकाः खलः थम्हं न्यानातःगु समेत यानाः २८ आना जग्गा दु । उगु जग्गाय् मंकाः खलःया दबूछेँ दनेगु लागिं उगु इलय् दँय्दसं यःमरि पुन्हिबलय् त्यःछिंत्यः फ्वनेगु अभियान न्ह्याकूगु खः ।

मंकाः खलः दर्ता मजूगु कारणं खलःया प्यम्ह वरिष्ठ पदाधिकारीतय् व्यक्तिगत नामय् लानाच्वंगु उगु जग्गा आः मंकाः खलःया विधिवत् दर्ता लिपा खलःया हे नामय् हयेगु ज्या जूगु खःसा आः अन हे दबूछेँ दनेगु ज्या न्ह्याकेत्यंगु खः । दबूछेँ दनेगु लागिं येँ महानगरपालिकां मंकाः खलःयात ५ करोड २५ लाख तका दां बीगु निर्णय याना तयेधुंकूगु दु ।

आः दयेकीगु दबूछेँ न्यातँजाः जुइ । थुकी भूमिगत पार्किङ यायेगु थाय् दइसा दकलय् च्वय् दबूप्याखं लिसें संकिपा समेत क्यने फइगु हल दयेकीगु खँ धाःगु दु ।

थन छगू स्वयां अप्वः अज्याःगु हल तयेगु व्यवस्था जुइत्यंगु दु । दबूछेँया थीथी तल्लाय् तःधंगु चीधंगु गोष्ठी, बैठक आदि यायेगु क्वथात नं दइ । नापं मंकाः खलःया ज्याकूया लागिं नं क्वथात दइ । अन नेपालभाषा आन्दोलनया इतिहास पिलुइ कथंया छगू म्युजियम समेत तयेगु नं ग्वसाः जुयाच्वंगु खँ धाःगु दु ।