लोकसेवा विज्ञापन विरुद्ध जनजातिया मशाल जुलुस

येँ – देय्न्यंकंया स्थानीय तहलय् कर्मचारी भर्ना यायेत लोकसेवा आयोगं पिकाःगु विज्ञापन असमावेशी जुल धासें म्हिगः थनया थाय्मदुं छगू मसाल जुलुस पिहां वल । उगु मशाल जुलुसयात प्रहरीं हस्तक्षेप यानाः छुं कार्यकर्तातय्त ज्वना यंकूगु दु । मशाल जुलुस व प्रहरीया दथुइ छझाः भिडन्त जूगु खः ।

उकी प्रहरीं मशाल लाका कायेगु कुतःय याःगु खः । उकी प्रहरीं प्यम्ह कार्यकर्तातय्त ज्वना यंकूगु खँ आन्दोलनकारीतय्सं धाःगु दु । असं व येँया लुँहितिं मसाल जुलुस पिकायेगु तयारी जुयाच्वंगु खःसां असनय् आपालं सशस्त्र प्रहरी तैनाथ यानातःगुलिं थाय्मदुं मसाल जुलुस पिकाःगु खँ समावेशी आन्दोलनया निंतिं नेवाः समन्वय समितिया सचिव श्रीकृष्ण महर्जनं ‘नेपालभाषा टाइम्स’ यात कनादीगु दु ।

मसाल जुलुसं सामान्य प्रशासन मन्त्री लालबाबु पण्डित राजिनामा बिउ, असमावेशी विज्ञापन लित का, राज्य व्यवस्था समितिया निर्देशन पालन या धइगु नारा थ्वयेकूगु खः । सलंसः मनूतय्सं ब्वति काःगु उगु मसालं जुलुस येँया थीथी थासय् चाःहिलाः शान्तिबाटिकाय् वंगु खः ।
लोकसेवाया विज्ञापन विरुद्ध थ्वहे वइगु साउन २ गते व १० गते नेपाल बन्दया नं आह्वान यानातःगु दु ।

उगु बन्द ज्याझ्वः ताःलाकेत म्हिगः मसाल जुलुस पिकाःगु खः । अथे हे थौं सिट्टी पुयाः जुलुस पिकाइगु ज्याझ्वः दुसा कन्हय् फिब्व ख्यलय् प्रदर्शन याइगु ज्याझ्वः दु ।

लोकसेवा आयोगं पिकाःगु विज्ञापन समावेशी मजू धासें आदिवासी जनजाति, थारु, मुस्लिम, दलित, अल्पसंख्यक, मिसा, तेस्रो लिंगी समुदायं समेत जानाः आन्दोलनया घोषणा यानातःगु दुसा उकियात ताःलाकेगु लागिं आः नियमित रुपं ज्याझ्वःत जुइगु खँ धाःगु दु ।

सम्बन्धित बुखँ

LEAVE YOUR COMMENTS