फ्वंसि व फ्वंसिपुया फाइदा

फ्वंसि (कटहर) छताजि अज्याःगु तरकारि खः, गुकिया नां कायेवं हे झीगु म्हुतुइ ई बुयावइ । संसारय् यक्व कथंया सिसाबुसा दु । उकी मध्ये दकलय् तग्वःगु सि खः फ्वंसि । थ्व पाके मजूनिबलय् तरकारि, अचार, पकौडा आदि दयेकाः नयेगु याइ । पाके जुलकि पु लिकयाः चाकुगु ला नइ । फ्वंसिइ यक्व कथंया तत्व दु ।

थुकी भिटामिन ए, भिटामिन सी, पोटाशियम, क्लासियम, आइरन व जिंक दु, गुकिं झीगु म्हयात माःगु थीथी आवश्यकया पूरा यानाबी । दकलय् बांलाःगु खँ थ्व दु कि थुकी क्यालोरी दइमखु । सुयातं हार्टयागु समस्या दुसा वयागु निंतिं फ्वंसि यक्व हे फाइदाजनक जुइ । थुकिया सेवन धायेबलय् क्वँय् बल्लाइ, लिसें स्वस्थ नं जुयाच्वनी । थुकिया सेवनं झीगु पाचनशक्ति नं बल्लाकी ।

ब्लड सुगर
फ्वंसिया छ्यलाबुला झीसं ब्लडसुगर कन्ट्रोल यायेत नं यायेफु । थुकिया लिसें थ्व कब्जियत नं लंकाबी ।

सँया निंतिं ः फ्वंसिपु झीसं ताःहाकः व ख्वातुगु सँया निंतिं छ्यलेफु । थुकिया निंतिं फ्वंसिपु निनाः चुं दयेकादिसँ । उगु चुं थःगु सँय् छ्यलादिसँ । थुकिं यानाः छिगु सँ हाकुसे ख्वातुसे च्वनाः ताःहाकः नं जुइ ।

मल्ह्वंकेत ः ल्ह्वंपिं मनूतय्सं फ्वंसिपु नयेगु यायेमाः, छाय्कि थुकी क्यालोरी तसकं कम जक दु ।

ख्वाः यचुकेत ः फ्वंसिपु चुं ल्हुयाः उकी कस्ति भतिचा ल्वाकछ्यानाः थःगु ख्वालय् बुल धाःसा ख्वाः सफा जुइ, अले चातःचितः दुसा च्वतुक वनी । गुपिं मनूतय् ख्वाः सुख्खा जुयाः फ्वःफ्वःधाइ, उमिसं फ्वंसिया रस ख्वालय् बुलेगु यायेमाः । थुकिया मसाज अबलय् तक यानादिसँ, गबलय् कि थ्व गनीमखु । वयां लिपा लखं ख्वाः सिलादिसँ ।

ला हय्हय्कुंसा ः ख्वाःया ला हय्हय्कुनीगु समस्या जुयाच्वंगु दुसा फ्वंसिया पेस्ट दयेकाः अले उकी छगू चम्चा दुरु ल्वाकछ्यानाः तीजक तीजक ख्वालय् बुलेगु यायेमाः । वयां लिपा गुलाबजल अथवा ख्वाउँलखं थःगु ख्वाः सिलेमाः । थथे यायेबलय् छुं न्हि लिपा हे फरक खनेदयावइ ।

क्यान्सर ः फ्वंसिपु नयेगु यानाच्वन धाःसा क्यान्सर थेंज्याःगु ल्वय्लिसे ल्वायेगु क्षमता दयावइ ।

ऊर्जाया स्रोत ः फ्वंसिपुयात ऊर्जाया छगू बांलाःगु स्रोत नालातःगु दु । छबार्चा फ्वंसिपु नल धाःसा छितः न्हिछि ज्या यायेत ऊर्जा प्राप्त जुइ ।

नुगःया ल्वय् ः फ्वंसिपु नयेगु यानाच्वन धाःसा छि तःताकथंया ल्वचं बचे जुयाच्वनेफइ । नुगः ल्वय् दुपिं मनूतय्सं छुं न्हि तक लगातार फ्वंसिपु नयाबिल धाःसा यक्व हद तक थ्व ल्वय् क्वलाइ ।

फ्वंसिपुया छ्यलाबुला
१) सियाः २) मनाः
फ्वंसिपुयात चायेगु मयासे सिलाः लिकयादिसँ । उकी यदि सियूगु ख्वला दुसा व वांछ्वयादिसँ । अनंलि हलू व चि तयाः उकियात दायेकादिसँ । वया लिपा छिं थ्व स्नाय्क्सया रुपय् भपादीफइ । छिं फ्वंसिपु मनाः उकी प्याज, लाभा, वाउँमल्ता तयाः भपादिसँ । छिं थ्व छुचुंमरिलिसे नं भपादी फइ ।