बंगलादेशयात बुकाः नेपाः साफ च्याम्पियन्सीपया सेमिफाइनलय्

नेपाः साफ च्याम्पियन्सीप फुटबलया सेमिफाइनलय् थ्यंगु दु । थौं बहनी जूगु कासाय् घरेलु टोली बंगलादेशयात २–० गोलं बुकुसें नेपाः सेमिफाइनलय् दुहां वंगु खः । मेखे पराजित जुइवं बंगलादेश धाःसा धेंधेंबल्लाखं पिने लाःवंगु दु ।

नेपाःया विजयया निंतिं विमल घर्तीमगर व नवयुग श्रेष्ठं छगू छगू गोल याःगु खः । कासाया सुरुं निसें नेपालं घरेलु टिम बंगलादेशयात दबाबय् लानाकातःगु खः । कासाया ३३ औं मिनेट घर्तीमगरं ३५ यार्ड तापाकं थ्वाःगु बल पोष्टय् दुहां वंगु खः । न्हापांगु हाफय् छगू गोल जुइधुंकाः लिपांगु हाफय् नं नेपालं बंगलादेशयात दबाबय् लाकूगु खः । तर कासाया अन्तय् जक मेगु गोल सम्भव जुल । कासाया ९० औं मिनेटय् नवयुग श्रेष्ठं गोल यासें नेपाःया विजय पक्का यानाबिउगु खः ।

थ्वयां न्ह्यव जूगु कासाय् पाकिस्तानं भूटानयात ३–० गोलं बुकेवं नेपाःयात थ्व कासा त्याके हे माःगु जूगु खः । कासा त्याःसां नेपाः गोल अन्तरया ल्याखं जक सेमिफाइनलय् दुहां वंगु खः । नेपाः त्यायेवं पाकिस्तान, बंगलादेश व नेपाः स्वंगुलिं टिमया ६–६ अंक जूगु खःसा भूटानयात ४–० गोलं बुकूगुया लबः कासें नेपाः गोल अन्तरया आधारय् सेमिफाइनलय् दुहां वंगु खःसा पाकिस्तान नं गोल अन्तरया ल्याखं सेमिफाइनलय् दुहांवंगु खः ।

सम्बन्धित बुखँ

LEAVE YOUR COMMENTS