कोरोनाया संक्रमण जूपिं हजारं अप्वल, थौं जक १५६म्ह संक्रमित

येँ – कोरोना भाइरसापाखें संक्रमण जूपिं एक हजारं अप्व जूगु दु । दकलय् न्हापांगु संक्रमण खनेदुगु प्यला लिपा नेपालय् संक्रमित जूपिं हजारं अप्व थ्यंगु खः । थौं थप १५६म्ह मनूतय्त संक्रमण जूगु दुसा आः तक संक्रमित जूपिनि ल्याः १ हजार ४२म्ह थ्यंगु दु । थौं सोलुखुम्बु, दोलखा, बझाङ व दार्चुलाय् नं संक्रमण खनेदुगु दु ।

बीपी कोइराला स्वास्थ्य प्रतिष्ठानय् याःगु परीक्षणय् सप्तरीया २म्ह, कोशी अस्पतालया प्रयोगशालाय् झापाया २५म्ह व भरतपुर अस्पतालय् याःगु परीक्षणय् नवलपुरया १म्हेसित संक्रमण खनेदुगु दु ।

अथेहे येँया राष्ट्रिय जनस्वास्थ्य प्रयोगशालाय् याःगु परीक्षणय् ७७म्हेसित संक्रमण जूगु पुष्टि जूगु खः । टेकुइ याःगु परीक्षणय् धनुषाया २९म्ह, महोत्तरीया १७म्ह, रौतहटया ३म्ह, सप्तरीया १२म्ह, सर्लाहीया ७म्ह, सिरहाया ६म्ह, दोलखाया २म्ह व सोलुखुम्बुया २म्हेसित कोरोनाया संक्रमण जूगु दु ।

सुर्खेत प्रादेशिक प्रयोगशालाय् याःगु परीक्षणय् बझाङया १म्ह, सुर्खेतया १३म्ह व दैलेखया ८म्हसित यानाः २३म्हेसित संक्रमण जूगु दु । गण्डकी प्रादेशिक प्रयोगशालाय् याःगु परीक्षणय् स्याङ्जाया ३म्ह, सेती अस्पतालया प्रयोगशालाय् दार्चुलाया १म्ह व कैलालीया २म्हेसि संक्रमण जूगु दु ।

अथेहे हेटौंडाय् याःगु परीक्षणय् मकवानपुरया १म्ह, भेरी प्रयोगशालाय् बर्दियाया ३म्ह व बाँकेया १म्ह व धुलिखेल अस्पतालय् याःगु परीक्षणय् रौतहटया १७म्हेसित कोरोनाया संक्रमण जूगु दु ।

नेपालय् आः तक ९४०म्ह मिजं व १०२म्ह मिसातय्त कोरोना भाइरसाया संक्रमण जूगु खँ स्वास्थ्य तथा जनस्वास्थ्य मन्त्रालयं धाःगु दु ।