गयेगु मखुला झ्याः मदुगु जहाज ?

छेँ, देगः लगायत भौतिक संरचना दयेकेबलय् झ्याः गन तयेगु, लुखा गन तयेगु धकाः विचाः यानाः डिजाइन दयेकी । व हे डिजाइनकथं भौतिक संरचना निर्माण याइ । झ्याः धइगु छगू कथं खुल्ला थाय्या परिकल्पना यायेत, पिनेया जः वयेकेत, फय् दुहांपिहां जुइत दयेकीगु खः । अथे हे रेल, बस, ट्याक्सी, जहाज, हवाइवजहाजय् नं झ्याः तयातःगु दु ।

छु छिं गबलें नं झ्याः मदुगु जहाजय् यात्रा यायेगु कल्पना यानादीगु दु ला ? व नं ८ – १० घन्टाया यात्रा । यदि छिं अज्याःगु कल्पना यानादीगु मदुसां आः छिगु अज्याःगु म्हगस पूवनीगु जूगु दु । छाय्कि दुबईया इमिरेट्स एअरलाइन्सं अज्याःगु हे विमान दयेकेगु योजना हःगु दु । एअरलाइन्सया मालिक सर टिम क्लार्कया कथं वइगु दँय् झ्याः मदुगु जहाज निर्माण यायेगु परिकल्पनायात सार्थकता बीगु तयारी जुयाच्वंगु दु ।

छुं दिं न्ह्यः छगः एअरलाइन्सया ‘फस्र्ट क्लास क्याबिन’ खण्डय् अज्याःगु हे दृश्य खनेदत, गुगु जहाजया क्याबिनय् छपाः नं झ्याः मदु ।जहाजय् झ्याः मदुसां यात्रुतय्सं पिनेया दृश्य धाःसा याउँक खंकेफु । जहाजय् ‘फाइबर अप्टिक्स’या माध्यमं जडान यानातःगु क्यामराया विशेष प्रणालीया ग्वाहालिं यात्रुतय्त पिनेया दृश्य नं सहज रुपं स्वये फइगु व्यवस्था यानातःगु खः ।

बोइंग ७७७–३०० ईआर जहाजया फस्र्ट क्लास क्याबिनय् थुकथंया सुविधा तकं बीधुंकूगु एअरलाइन्सं याकनं हे थःपिनिगु थ्व सुविधायात जहाजया दक्वं खण्डय् विस्तार यायेगु तयारी यानाच्वंगु दु । वास्तवय् विमानय् वास्तविक झ्याःया पलेसा ‘भर्चुअल’ झ्याः दइ ।

एअरलाइनस मालिक क्लार्कया धापूकथं झ्याः मदुगु जहाजया संरचना बल्लाइगु जक मखसे उकिया ग्यसु (तौल) नं म्हो जुइ । अले याकनं उडान याये फइगुलिं इन्धन नं म्हो जक खपत जुइ ।