‘वडाया विकासय् ल्याय्म्हतय् भूमिका’
यल- यल महानगरपालिका वडा नं. ११ शिक्षा, युवा व खेलकुद समितिया ग्वसालय् ‘वडाया विकासय् ल्याय्म्हतय् भूमिका’ विषयय् छगू अन्तक्र्रिया ज्याझ्वः जुल । अन्तक्र्रियाय् वडाया विकासय् ल्याय्म्हतय् सहभागिता सुनिश्चित यायेमाःगु नापं वडाया योजना तर्जुमा यायेबलय् व योजना कार्यान्वयन यायेबलय् ल्याय्म्हतय्त नं दुथ्याकेमाःगु खँय् वक्तातय्सं बः बिउगु दु । अन्तक्र्रिया ज्याझ्वःया संयोजक नापं वडा सदस्य कृष्ण महर्जनं वडाया थीथी त्वालय् ल्याय्म्हतय् आवश्यकता पहिचान यानाः योजना तर्जुमा यायेत व वडास्तरीय संजाल निर्माण यायेगु उद्देश्यं उगु अन्तक्र्रिया ज्याझ्वः यानागु जानकारी बियादिल ।
राष्ट्रिय उपभोक्त मंचया अध्यक्ष प्रेमलाल महर्जनं ज्याझ्वःया उलेज्या यासें ल्याय्म्ह पुस्ताया सामाजिक, आर्थिक, विकासय् स्थानीय तहया भूमिका महत्वपूर्ण व प्रभावकारी जुइमाः धासें रचनात्मक गतिविधिइ संलग्न याये मफुत धाःसा समाजया विकासया निंतिं आवश्यक दक्ष जनशक्तिया उत्पादन मजुइगु जक मखु कुलतय् तक्यने फुगु खतरा दु धयादिल ।
यल मनपा ११ वडाया वडा सदस्य नापं कार्यपालिकाया दुजः आपुलु शाक्यं चालु आर्थिक दँय् ल्याय्म्हतय्त लक्षित यानाः बजेट हये मफुसां वइगु आर्थिक दँय् वडास्तरीय ल्याय्म्हतय् भेला, युवा सशक्तिकरण, नेतृत्व विकासया निंतिं बजेट विनियोजन यायेगुपाखे फक्व कुतः यायेगु जुइ धयादिल ।
राष्ट्रिय युवा महासंघया अध्यक्ष राजेश वज्राचार्यं वडा, त्वाः, गुथि लगायत सामाजिक संस्थां ल्याय्म्हत सक्रिय जुइगु, क्षमता अभिवृद्धि व विकास यायेगु क्षमताया सदुपयोग यायेगु वातारण दयेका वनेमाःगु खँय् बः बियादिल ।
ज्याझ्वलय् महानगरीय प्रहरी प्रभाग मंगलबजाःया प्रमुख नापं प्रहरी निरीक्षक केशरी न्यौपाने, च्वबु गाहिति टोल सुधार समितिया अध्यक्ष दिनेश महर्जन, अधिवक्ता लक्ष्मण महर्जन, बौद्ध युवा कमिटीया पुलांम्ह नायः नापं संचारकःमि सुनील महर्जन लगायतया वक्तातय्सं वडास्तरीय संजाल निर्माण यायोमाःगु, नेपालभाषा नापं संस्कृतिया विकासया निंतिं एप्सया निर्माण यायेमाःगु, भाषा संस्कृतिया संरक्षणय् लगे जुयाच्वंपिं समसातय् क्षमता अभिवृद्धि यायेमाःगु नापं ल्याय्म्हतय्त लक्षित यानाः बजेट विनियोजन यायेत माःगु खँय् बः बियादीगु खः ।
LEAVE YOUR COMMENTS