ख्वपय् यँयाः, इन्द्रायणीया खः जात्रा

ख्वप(नेपालभाषा टाइम्स)/थनया खौमा त्वाःस्थित इन्द्रायणी द्यःयात खतय् बिज्याकाः जात्रा यासें ख्वपय् नं तःजिक यँयाः जात्रा शुरु जूगु दु । ख्वप नगरपालिकाया खौमा त्वाःस्थित इन्द्रायणी द्यःयात द्यःछेँय नं पित हयाः द्यःयात खतय् बिज्याकाः जात्रा यासें यँयाः न्यायेकूगु खः ।
वंगु शनिवाः स्थानीयतय्‌सं इन्द्रायणी द्यःयात सांस्कृतिक बाजंसहितं द्यः छेँय् नं पित हयाः खतय् तयाः जात्रा याःगु खः । उगु इलय् इन्द्रायणी द्यःयात बाचाः मुकेगु धकाः ख्वप देय् बछि चाःहिकूगु खः । वयां लिपा द्यःयात थनया यकिं दह सिद्धपुखुलिइ बिज्याकूगु खः । इन्द्रायणी द्यःयात यकिं दहय् यंकेधुंकाः अन म्हीग बहनिनिसें चछि व म्हिगः यँयाःपुन्हिकुन्हु न्हिछि धयाथें तयातःगु खः ।
इन्द्रायणी द्यःयात यकिं दह सिद्धपुलिइ बिज्याकीगु इलय् तःधंगु मेला जुइ । यँयाःपुन्हिकुन्हु न्हिछि तयेधुंकाः सनिलय् हाकनं सांस्कृतिक बाजंसहितं इन्द्रायणी द्यःयात खौमास्थित द्यःछेँय् बिज्याकूगु खः । द्यःछेँय् द्यः बिज्याकेवं थनया यँयाः जात्रा नं क्वचाइ ।
नेपाल संवत् २१८ य् देवराज इन्द्रं थःगु नामं स्वनिगःया हे दकलय् तःधंगु पुखू दयेकूगुलिं उगु पुखूया नां यकिं दह (इन्द्र दह) जूगु धइग कथन दु । अथे हे मेगु छगू धार्मिक विश्वास कथं स्वर्गया जुजु इन्द्रं म्वःल्हूगु थासय् जूगुलिं उकिया नां यकिं दह जूगु धइगु नं धार्मिक विश्वास व मान्यता दया वयाच्वंगु दु । यँयाःपुन्हि छन्हु न्ह्यः यंलाथ्व चतुर्दशिकुन्हु यकिं दह (सिद्धपुखू) छचाःखेरं चाकःमत च्याकाः झः झः धायेकेगु याना वयाच्वंगु दु ।