सिंहदरवार सुनसान, मन्त्रीं ब्वःगु ज्याय् आलटाल
येँ (नेपालभाषा टाइम्स)÷नेपाली कांग्रेस व एमाले दथुइ जूगु न्हूगु सहमति कथं आः न्हूगु हे सरकार वइगु जुइसातकि प्रचण्ड नेतृत्वया वर्तमान सरकारयात कर्मचारीतय्सं टेरे यायेगु त्वःता हःगु दु । वर्तमान सरकार क्वःदलीगु निश्चित जुइवं थीथी मन्त्रालयय् च्वंपिं कर्मचारीतय्सं मन्त्रीयात टेरे मयायेगु व मन्त्रीं धाःगु ज्यायात समेत मयासे च्वनेगु प्रवृत्ति क्यना हःगु खँ सीदुगु दु ।
विशेष यानाः मन्त्रालयय् च्वंपिं सचिवतय्सं मन्त्रीयात टेरे मयायेगु शुरु याना हःगु धाःगु दु । सरकार हिलीगु जुइवं म्हिगःनिसें देय्या प्रमुख प्रशासकीय केन्द्र सिंहदरवार समेत सुनसान खने दयाच्वंगु दु । उकुन्हु तक सिंहदरवार दुने सरकारी व निजी गाडीत ग्वाःग्वाः दइगु खःसा म्हिगःनिसें अज्याःगु गाडी तकं म्हो जुया वंगु खँ अनया सुरक्षा गार्डतय्सं धाःगु दु ।
सिंहदरवार दुनेया गुलिखे मन्त्रालयय् धाःसा म्हिगः सिधयेके हे माःगु छुं छुं ज्या सिधयेकेगु लागिं मन्त्री व सचिवतय् गोप्य बैठकत नं जुयाच्वंगु दु । उकी खास यानाः पुलांगु मिति तयाः याये माःगु ज्या क्वचायेकेत सहलह जूगु खँ सूत्रतय्सं धाःगु दु ।
कर्मचारीं टेरे मयाःगु कारणं छुं मन्त्रीतय्त धाःसा पुलांगु ज्या समेत यायेत थाकुयाच्वंगु दु । मन्त्रीतय्सं न्हापा धयातःगु ज्या समेत कर्मचारीतय्सं आः वयाः व मिले मजू, थ्व मिले मजू धकाः त्वहः तयेगु याना हःगु खँ नं सीदुगु दु ।
मन्त्रीयात टेरे मयाइगु जुइवं सिंह– दरवारय् ज्या याइपिं कर्मचारीतय् नं फुर्सद पिहां वःगु दु । अप्वः धइथें कर्मचारीत म्हिगः थःपिनि ज्याकू दुने व पिने क्यान्टिनय् च्वनाः न्हूगु सरकार गय् यानाः दयेकी व थःगु मन्त्रालयय् सु मन्त्री वइगु जुइ धकाः अनुमान यानाः गफ यानाच्वंगु खँ नं अनया कर्मचारी सूत्रं धाःगु दु ।
सरकारयात ज्या मयायेत ध्यानाकर्षण
एमाले व कांग्रेसया नेतृत्वय् न्हूगु सरकार गठन यायेगु सहमति जुइवं आः वर्तमान सरकारयात दीर्घकालीन लिच्वः लाइगु छुं नं ज्या याये मते धकाः एमालें ध्यानाकर्षण याःगु दु । एमालेया महासचिव शङ्कर पोखरेलं म्हिगः छगू प्रेस विज्ञप्ति हे पिकासें थःपिंसं विश्वासया मत लित कायेधुंकाः सरकार अल्पमतय् लाःगु जुयाः दीर्घकालीन लिच्वः लाइगु छुं नं ज्या याये मते धकाः प्रधानमन्त्रीया ध्यानाकर्षण याःगु खः । आःया परिस्थितिइ वर्तमान सरकारं विश्वासया मत काये फइगु अवस्था मदुगुलिं राष्ट्रिय सहमतिया सरकारय् सहभागी जुइत नं एमालें माओवादीयात इनाप याःगु दु ।
अथे हे नेपाली कांग्रेसया महामन्त्री गगन थापां नं प्रधानमन्त्री पुष्पकमल दाहालयात राजीनामा बियाः निकास चायेकेत इनाप यानादीगु दु । म्हिगः विराट– नगरय् न्ववासें वय्कलं उगु खँ धयादीगु खः ।
LEAVE YOUR COMMENTS