‘कोशी’ इ वडा ज्याकू च्याकल

नेपालभाषा टाइम्स
११४३ चौलाथ्व तृतीया
- बुखँ
- स्वनिगः
किपा-आन्दोलनय् लानाः मदुम्लाह जेहाङ (पद्म) लिम्बु

येँ (नेपालभाषा टाइम्स)- प्रदेश नं. १ या नां ‘कोशी’ तःगु विरुद्ध शुरु जूगु आन्दोलनय् लानाः छम्ह आन्दोलनकारी सीवं आः थ्व आन्दोलन अझ तच्वया वनीगु संकेत खने दया वःगु दु । ‘कोशी’ विरुद्ध म्हीग विराटनगरय् जूगु आन्दोलनय् प्रहरीया कथि नयाः स्थानीय लिम्बु कार्यकर्ता लाजेहाङ (पद्म) लिम्बु घाःपाः जूगु खः । लिपा धरानया वीपी कोइराला अस्पतालय् तयाः वासः याकूगु खःसा वंगु चान्हय् २ः३० बजे लिम्बु मदुगु खः । धरानय् वासः यानाः मजीवं वयात हेलिकप्टरय् तयाः येँय् हयेगु तयारी जूगु खःसां हये मलाकं मदुगु खः ।

लिम्बु मदयेवं आः कोशीया आन्दोलन अझ हे तच्वया वनीगु संकेत खने दया वःगु दु । ‘प्रदेश नं. १ पुनः नामांकन संयुक्त संघर्ष समितिं’ थुकियात हत्याया संज्ञा बिसें थुकिया बदला कायेगु घोषणा याःगु दु । मदुम्ह लाजेहाङयात शहीद घोषणा यायेमाः धासें आः प्रदेश १ या नां हिलां त्वःतेगु प्रतिवद्धता नं समितिं प्वंकूगु दु ।

थ्वहे झ्वलय् म्हिगः ताप्लेजुङया माङसेबुङ गाउँपालिका वडा नं. ५ या वडा कार्यालयय् ‘कोशी प्रदेश’ च्वयातःगु लेटरहेड छ्यलाच्वंगुलिं अन आक्रमण यानाः अज्याःगु लेटरहेड फुक्क च्याका बिउगु दु । लेटरहेड च्याकूगु इलय् ज्याकूया फर्निचर, कम्प्युटर व प्रिन्टर समेत मिं नःगु खः ।

लुमंकेबहः जू, थ्व स्वयां न्ह्यः लिम्बुवान आन्दोलनकारीतय्सं कोशी प्रदेशया मुख्य मन्त्री हिक्मत कार्कीयात आक्रमण याःगु खःसा वयां लिपा माओवादी संसदीय दलया नेता इन्द्रबहादुर आङ्बोयात नं आक्रमण याःगु खः । आन्दोलनय् मदुम्ह लाजेहाङया लुमंतिइ म्हिगः येँया फिब्व ख्यलय् नं छगू प्रदर्शन जूगु दु । उकी प्रदेश १ या पहिचानवादी कार्यकर्तातय्सं ब्वति काःगु खः ।