वाम कार्यकर्ता नानीमैंया तताया अन्त्यष्टी
येँ – वामपन्थी कार्यकर्तातय् दथुइ ‘नानीमैंया तता’ या नामं म्हसिउम्ह वाम कार्यकर्ता लिसें नेपालभाषा ह्यमि नानीमैंया नकर्मी म्हिगः मंत । वय्कः ९५ दँया वैंसय् मदुगु खः ।
म्हिगः हे पशुपतिया विद्युत शवदाह गृहय् वय्कःया अन्तिम संस्कार नं यात । उगु इलय् नेकपा एमालेया नेता कृष्णगोपाल श्रेष्ठं वय्कःया सीम्हय् पार्टीया
ध्वाँयय् फायेकादीगु खः । मदुम्ह नकर्मीं थः मदयेधुंकाः छुं नं कथंया धार्मिक क्रियाकर्म मयासे विद्युतीय शवदाह गृहय् अन्त्येष्टि याना बिउ धकाः प्वंकातःगु इच्छा कथं अन्तिम संस्कार याःगु खँ धाःगु दु ।
येँय् हे जन्म जुयादीम्ह मय्जु नकर्मी येँया ज्यापु म्ह्याय्मचा खः । लिपा नकर्मीलिसे इहिपा जुइवं वय्कःया नांया लिउने नकर्मी च्वन । वय्कः ज्यापु न्ह्यलुवा विपिन महर्जनया तता जुयादी ।
वि.सं. १९९७ सालय् प्यम्ह सहिदपिंत फाँसी बिल धइगु खँ न्यनाः परिवर्तनया लागिं राजनीतिइ दुहां झाःम्ह वयक्लं पुष्पलाल श्रेष्ठ, मनमोहन अधिकारी, पुष्पलाल अमात्यपिं लिसे नं यक्व ज्या यानादीगु दु । वय्कः परिवर्तनया लागिं जुइगु हरेक आन्दोलनय् सहभागी जुयादी । नेवाः अधिकारया लागिं जुइगु थीथी भाषिक आन्दोलनय् नं वय्कः सहभागी जुयादीगु दु । वय्कःया योगदानया कदर यासें थीथी संघसंस्थां वय्कःयात सम्मान यानातःगु दु ।
LEAVE YOUR COMMENTS