कोरोनाया खोप कायेत इनाप

येँ (नेपालाषा टाइम्स)- स्वास्थ्य तथा जनसंख्या मन्त्रालयं कोरोना संक्रमण अप्वयाच्वगुलिं कोरोना भाइरस विरुद्धया खोप कायेत इनाप याःगु दु । मन्त्रालयं न्हिथं सक्रमण अप्वया वनाच्वंगुलिं खोप कायेत इनाप याःगु खः ।

मन्त्रालयया सहप्रवक्ता डा. समिरकुमार अधिकारीं संक्रमण अप्वया वनाच्वंगुलिं न्हापांगु मात्रा, निगूगु मात्रा व बुस्टर डोज कायेत इनाप यानादीगु खः । शून्यय् कुहां वयेधुंकूगु कोरोना भाइरसया संक्रमण थौंकन्हय् न्हिथं अप्वया वनाच्वंगु दु । म्हीग जक ६४ म्ह न्हूपिं संक्रमित लूगु खः । थौंकन्हय् सक्रिय संक्रमितया ल्याः ३५७ म्ह थ्यंगु दु । स्वनिगलय् म्हीग तक संस्थागत आइसोलेसनय् १५ म्ह व न्याम्ह भेन्टिलेटरय् वासः याकातःगु दु ।

स्वास्थ्य मन्त्रालयया कथं येँया वीर अस्पताल, शिक्षण अस्पताल, टेकु अस्पताल, कर्मचारी अस्पताल, सशस्त्र प्रहरी बल अस्पताल व नेपाल प्रहरी अस्पतालं खोप बीगुया लिसे बुस्टर डोज बीगु व्यवस्था दुगु खँ नं धाःगु दु ।

मन्त्रालया कथं छुं न्हि न्ह्यः याःगु अनुवंशिक अध्ययन कथं नेपालय् न्हापांखुसी कोरोना भाइरसया न्हूगु भेरियन्ट लूगु दु । ओमिक्रोन एक्सवीवी.१.१६ लूगु खँ नं मन्त्रालयं धाःगु दु ।