येँ मनपाया बजाः अनुगमन : १२३ पसःपाखें जरिवाना वापत १३ लाख असुल

येँ (नेपालभाषा टाइम्स) – येँ महानगरपालिकापाखें न्ह्याकाच्वंगु बजाः अनुगमनया झ्वलय् जरिवाना वापत आतकया दुने करिब १३ गू लाख बराबारया असुली याःगु दु। येँ मनपां तरकारि, सिसाबुसा, खाद्यान्न, मरि लगायतया पसलय् अनुगमन यायेगु झ्वलय् करिब १२३ गू पसलय् अनुमगन याःगु खः ।

येँ मनपां वंगु स्ववाः न्ह्यवंनिसें याना वयाच्वंगु अनुमगनया झ्वलय् व्यापारीपाखें जरिवाना स्वरुप १२ गू लाख ८७ हजार तका दां असुल यायेधुंकूगु दु। जरिवानाय् लाःपिं व्यापारीतय्त म्होतिं नं द्वःछि तका निसें अप्वलय् निगू लाख न्यय्न्याद्वः तका जरिवाना याकूगु दु ।

येँ महानगरपालिका उपभोक्ता हित संरक्षण समितिपाखें बजाः अनुगमन सम्बन्धी लिपांगु जानकारी बीगु ल्याखं ग्वसाः ग्वःगु पत्रकार सम्मेलनय्थु गु जानकारी बिउगु खः । समितियाकथं वंगु नीनिन्हुया दुने तरकारि, खाद्य, किराना, सिसाबुसा लगायतया १२३ गू पसलय् अनुगमन यानागु व थुकीमध्ये निगू दर्जन स्वयां अप्वः पसःयात करावाही स्वरुप जरिवाना यानागु जानकारी बिउगु दु ।

पत्रकार सम्मेलनय् अनुगमनपाखें प्राप्त उपलब्धीया बारे जानकारी बियादिसें येँ मनपाया उपप्रमुख नापं समितिया संयोजक हरिप्रभा खड्गी श्रेष्ठं अनुगमनया झ्वलय् भाः व गुणस्तरय् उपभोक्तायात ठगे याःपिं कालिमाति तरकारि व फलफुल बजाःया निगू व बल्खुया तरकारि व फलफुल बजाःया निगू पसःयात जिल्ला प्रशासन ज्याकूपाखें कारवाही प्रक्रिया न्ह्याकाुगु खँ कनादिल ।

निगू तरकारि बजाःया पसल्यातय्सं प्याजया कृत्रिम अभाव सृजना यानाः प्रतिकिलो १३० तकां मियाच्वंगु लुइवं इमिगुपाखें बरामद याःगु १३,२६८ किलो प्याज खाद्य व्यवस्था तथा व्यापार कम्पनीपाखें दक्वं खर्च कटे यानाः अप्वलय् ६० तका दर मीगु व्यवस्था यानागु नं जानकारी बिउगु खः ।

वय्कलं कोरोना संक्रमणया कारणं छखे जनताया आय श्रोत स्यनाः हैरान जुयाच्वंगु व मेखे व्यापारीतय्सं कृत्रिम अभाव व मूल्यवृद्धि यानाः समस्याय् लाकाच्वंगु धासें महामारी दु धकाः सुयात नं छुट बीगु जुइमखु धयादिल । अनुगमनया झ्वलय् म्याद फुइधुंकूगु आपालं खाद्य ज्वलं नं नष्ट याःगु खः। थुकथं नष्ट याःगु खाद्य सामग्रीइ केँ, मैदा, नयेचिकं, बट्टा व प्याकेटय्त यातःगु नसाज्वलं, चकलेट, विस्कुट, मसला, सिसाबुसा, जुस, चाउचाउ, चाउमिन, लः लगायतया पेय पदार्थ खः ।

अनुगमनया नेतृत्व यानाच्वनादीम्ह हरिबहादुर भण्डारीं अनुगमनया झ्वलय् पसलय् मूल्यसुची, व्यवसाय दर्ता, नवीकरण, नापतौल प्रमाणपत्र,  लेभल मदुगु, म्याद फुइधुंकूगु आदि सामग्री दुगु जानकारी बियादिल । कालिमाति, कुलेश्वर, बालाजु, कोटेश्वर, बनस्थली मनोहरा, माछापोखरी, तीनकुने, नंसाः, लगायतया क्षेत्रय् याःगु अनुमगनया इलय्क रिब १० लाख मूल्य बराबरया खाद्य सामग्री नं नष्ट याःगु खः ।

सम्बन्धित बुखँ

LEAVE YOUR COMMENTS