अाेलीयात भितुना बीत पाकिस्तानी प्रधानमन्त्री येँय्
येँ – पाकिस्तानया प्रधानमन्त्री शहीद खकान अब्बासी नेपाःया निन्हुयंकंया भ्रमणया निंतिं थौं न्हिनय् येँय् थ्यंकः झाःगु दु । नेपाःया न्हूम्ह प्रधानमन्त्री केपी ओलीयात भिंतुना देछायेगु निंतिं वय्कः नेपाः भ्रमणय् झायादीगु खः ।
वय्कः सोमवाः न्हिनय् पाकिस्तानी सेनाया विशेष विमानं येँय् थ्यंकः झाःगु खः । वय्कःयात अर्थमन्त्री डा. युवराज खतिवडा, परराष्ट्र सचिव शंकरदास बैरागीं त्रिभुवन अन्तर्राष्ट्रिय विमानस्थलया अति विशिष्ट कक्षय् लसकुस याःगु खः ।
वय्कःयात थौं हे नेपाली सेनां सैनिक मञ्च तिंख्यलय् गार्ड अफ अनर (सम्मान गारत) प्रदान याइगु ज्याझ्वः दु । वय्कलं थौं हे प्रधानमन्त्री केपी ओलीयात नापलासें खँल्हाबल्हा यानादी । पाकिस्तानी प्रधानमन्त्री अब्बासीया सम्मानय् थौं छगू चाभ्वय् नं ग्वसाः ग्वयातःगु दु ।
प्रधानमन्त्री अब्बासीं कन्हय् सुथय् राष्ट्रपति विद्या भण्डारीयात राष्ट्रपति भवन शीतल निवासय् नापलानादीसा थ्वयां न्ह्यव माओवादी अध्यक्ष पुष्पकमल दाहाल लिसे नं नापलानादी । वय्कः कन्हय् हे सनिलय् पाकिस्तान लिहां झाइ ।
LEAVE YOUR COMMENTS