
यल – बुंगःद्यः जात्राया झ्वलय् याकःमिसाया भुज्याः कुन्हु द्यः सालाच्वंगु इलय् मदुम्ह चन्द्रमाया महर्जनया छेँजःपिंत क्षतिपूर्ति बीगु दु । मिस्तय्सं जक द्यः सालीगु याकःमिसाया भुज्या कुन्हु द्यः सालाच्वंगु इलय् हुलमुलय् खिपतं लानाः ७२ दँया महर्जन मदुगु खः । द्यः सालाच्वंगु इलय् दुर्घटनाय् लानाः मदुगुलिं वय्कःया छेँजःपिंत न्यागू लाखया क्षतिपूर्ति बीत्यंगु खः ।
बुंगःद्यः जात्राया झ्वलय् छुं नं कथं दुर्घटना जुल धाःसा क्षतिपूर्ति बीगु निंतिं दयेकातःगु बास्केट फण्डपाखें थ्व क्षतिपूर्ति बीत्यंगु खः । ज्यापु समाज यलया पहलय् यल महानगरपालिका, गुथि संस्थान व जिल्ला समन्वय समितिं ध्यबा तयाः थुगु फण्ड दयेकातःगु खः । यल मनपा, गुथि संस्थान व जिल्ला समन्वय समिति यलं दँय् न्यय्द्वः–न्यय्द्वः तका तयाः थ्व फण्ड दयेकातःगु खः ।
आः ज्यापु समाजया हे पहलय् क्षतिपूर्ति बीत्यंगु खः । समाजया सचिव मोहन व्यञ्जनकारं क्षतिपूर्ति बीगु खँ फण्डया बैठकं पारित जुइधुंकूगु खँ धयादिसें आः छगू न्हि जक क्वःछिनाः क्षतिपूर्ति बीगु खँ धयादीगु दु ।
LEAVE YOUR COMMENTS