‘यः मदन दाई’ म्येँया म्युजिक भिडियो पितब्वज्या
यल (नेपालभाषा टाइम्स)÷ आनन्दरत्न वज्राचार्यं च्वयादीगु व अनिल तुलाधरं लय् तयादीगु ‘यः मदन दाई..’ या म्युजिक भिडियोया पितब्वज्या वंगु सोमबार लुभूया महालक्ष्मी ब्यांक्वेटय् जुल ।
कृष्णभक्त श्रेष्ठ (के.बि.एस.) लुभुया सभापतित्वय् न्ह्यागु उगु ज्याझ्वलय् जनकवि दुर्गालाल श्रेष्ठ मूपाहां कथं झायाादीगु खःसा ज्याझ्वलय् कलाकार, प्राविधिक व ग्वाहालिमिपिंत सुभाय्–पौ लःल्हागु खः ।
ज्याझ्वलय् केबिएस प्रोडक्सन हाउसपाखें पिकागु ‘यः मदन दाई’ म्येँया लिसें थीथी नेपालभाषाया म्युजिक भिडियो नं क्यनेगु ज्या जूगु खः । प्रिमियर जूगु ‘यः मदन दाई’ म्येँय् मदनकृष्ण श्रेष्ठ, निशा देशार व दीपा महर्जनपिंसं सः बियातःगु दु ।
थुगु म्यू्रजिक भिडियोलय् मदनकृष्ण श्रेष्ठ, भिंतुना जोशी, रोजिना सुवाल, मीरा डंगोल, सरिता श्रेष्ठ, पुष्पलाल मानन्धर, व कृष्णभक्त श्रेष्ठपिंसं अभिनय यानातःगु दुसा थुगु म्यृुजिक भिडियो बालमुकुन्द प्रजापति व विश्वास बज्राचार्य जानाः निर्देशन यानादीगु खः ।
अथे हे थुगु म्यूजिक भिडियोया सिनेम्याटोग्राफर, ड्रोन व सम्पादन लुभू वेभ म्यूजिक इन्ष्टिच्यूट एण्ड स्टुडियोया सैलेश श्रेष्ठ लुभुं यानादीगु खःसा मेकअप आर्टिष्ट उमेश पाण्डें खः ।
नेपालभाषाया संगीत ख्यलय् ख्यालीजुजु मदनकृष्ण श्रेष्ठं आपालं योगदान यानादीगुया कदर स्वरुप वय्कःया विषयलय् नं म्येँ तयार याना वनेमाः धइगु बिचाःकथं थुगु म्येँ वय्कःया व्यतित्ववयात कःघाना च्वयागु खः धकाः म्येँच्वमि वज्राचार्यं कनादिल । थुगु म्यूजिक भिडियो निर्भान मिडिया नेपालया यूट्युब च्यानलपाखें सार्वजनिक जूगु दु ।
थ्व म्येँया नापनापं केबिएस प्रोडक्शन पाखें हे निर्माण जूगु ‘ धौबजि’ नांयागु चिहाः संकिपा नं उगु हे ज्याझ्वलय् पितब्वज्या जूगु खः । ज्याझ्वलय् मूपाहाँ जनकवि श्रेष्ठ , ख्यालिजुजु श्रेष्ठ लगायत पितब्वज्या जूगु म्येँया म्युजिक भिडियोयात कयाः थःपिनि नुगः खँ तयादीगु खः।
LEAVE YOUR COMMENTS