थीथी त्वहः चिनाः यात्रु ठगे याःगु ट्याक्सीयात कारवाही

येँ –  ट्राफिकं यात्रु ठगे याइपिं ट्याक्सी चालक कारवाही अभियानयात तीव्रता बिउगु दु । महानगरीय ट्राफिक प्रहरी महाशाखां खटे जूगु पुचलं लिपांगु इलय् थीथी त्वहः तयाः यात्रु ठगे याःगु धासें ख्वीन्हय्म्ह ट्याक्सी चालकयात कारवाही याःगु खः ।

महाशाखां बिउगु छगू जानकारीकथं महाशाखापाखें खटे जुया वंगु पुचलं यात्रुलिसें मोलमोलाइ (बार्गेनिङ) याःगु धासें झिम्ह, यात्रुं धाःगु थासय् वनेत माने मजूपिं पीम्ह ट्याक्सी चालकयात कारवाही याःगु खःसा महाशाखाया हे थीथी युनिटपाखें खटे जूगु पुचलं झिंन्हय्म्ह ट्याक्सी चालकयात कारवाही याःगु खः ।

ट्राफिक प्रहरी प्रवक्ता जयराज सापकोटां बियादीगु जानकारीकथं ट्राफिकं ‘हाउमच’ नांया अभियान हे संचालन यानाः यात्रुलिसें मोलमोलाइ याइपिं ट्याक्सी चालकयात कारवाही यायेगु याना वयाच्वंगु दु । थ्व अभियानय् कारवाहीइ लाःपिं ट्याक्सी चालकयात कारवाहीलय् लाक्वपतिकं स्वद्वः तका जरिवाना कायेगु याना वयाच्वंगु दु ।

नापं न्याक्वः स्वयां अप्वः कारवाहीइ लाःपिं ट्याक्सी चालकया अनुमति पत्र हे निलम्बन यायेत यातायात व्यवस्था ज्याकूयात सिफारिस नं यायेगु याना वयाच्वनागु प्रवक्ता सापकोटां जानकारी बियादिल ।

थुकथं हे मिटरय् वनेत माने मजुइपिं, ट्याक्सीया मिटर स्यंकीपिं, स्यंगु मिटर इलय् मदयेकीपिं ट्याक्सी चालकयात नं न्यासःनिसें झिंन्यासः तका जरिवाना कायेगु याना वयाच्वनागु वय्कलं कनादिल । ट्राफिक प्रहरीं नियमित रुपं अनुगमन यानाः ट्याक्सी चालकयात कारवाही यायेगु याना वयाच्वंगु दु ।

सम्बन्धित बुखँ

LEAVE YOUR COMMENTS