ने. सं. ११४४ कौलाथ्व पारू - नःलास्वनेगु

ख्वपय् मानन्धर ल्याय्म्हतय् संघ गठन

ख्वप – ख्वपय् मानन्धर समुदायया ल्याय्म्हत जानाः भक्तपुर जिल्ला मानन्धर युवा संघ गठन याःगु दु । संघं न्हुछेरत्न मानन्धरया नेतृत्वय् २१ म्ह दुजः दुगु ज्यासना पुचः नं ल्यःगु दु । उकी प्रथम उपाध्यक्ष बाबुकाजी मानन्धर, द्वितिय उपाध्यक्ष रामबहादुर मानन्धर, सचिव ज्ञानेन्द्र मानन्धर, कोषाध्यक्ष वर्तराम मानन्धर च्वनादीगु दु ।

ज्यासना पुचःया दुजलय् छम्ह मिसा पदाधिकारीयात न्हू नीस्वंगु संघया न्हापागु बैठकं मनोनित यायेगु अध्यक्ष मानन्धरं जानकारी बियादिल । ख्वपया जगातिस्थित होटल भ्यूलय् जूगु घोषणासभां नीम्ह पदाधिकारीया नां घोषणा याःगु खः । समुदायया शैक्षिक, सामाजिक, आर्थिक विकास यानाः जीवनस्तर सुधार यायेगु लक्ष्यं संघया गठन जूगु अध्यक्ष मानन्धरं कनादिल ।

ज्याझ्वलय् राष्ट्रिय व अन्तर्राष्ट्रिय क्षेत्रय् ल्याय्म्हतय्सं बिउगु योगदान व उपलब्धियात कदर यायेकथं सम्मान यायेगु झ्वलय् मिस लिटिल नेवाः–११३७या विजेता जेनी मानन्धर, वंगु छुं दिं न्ह्यः जक बंगलादेशय् क्वचाःगु एस.क्यु.सी.सी. अवार्ड–२०१८या विजेता लसता मानन्धर व राष्ट्रिय वक्तृत्वकलाया विजेता रोहित मानन्धरयात नं सम्मान याःगु खः ।

शिवप्रसाद मानन्धरया सभापतित्वय् जूगु ज्याझ्वलय् प्रतिनिधिसभा सदस्य रामवीर मानन्धर, पुलांम्ह मन्त्री सुनीलकुमार मानन्धर, प्रदेशसभा सदस्य वसन्त मानन्धर, बारा जिल्लाया प्रमुख जिल्ला अधिकारी विजयनारायण मानन्धर, केन्द्रीय मान्धर संघया पदाधिकारीपिं, पुलांम्ह सांसद लक्ष्मीदास मानन्धर, वरिष्ठ साहित्यकार, संस्कृतिविद् नापं शिक्षाविद् ज्ञानकाजी मानन्धर, मिस नेपाल–२०१५ इभाना मानन्धर लगायत थीथी बाजंया गुरु, कजि लगायत आपालं विशिष्ट व्यक्तित्वपिनिगु उपस्थिति दुगु खः ।